Rikthehen sulmet me armë në shkolla në SHBA: Dy fëmijë të vdekur, 14 në spital, 2 në gjendje kritike

Dy fëmijë të mitur, të moshës tetë dhe dhjetë vjeç, janë viktimat e sulmit të armatosur që ndodhi këtë të mërkurë në Minneapolis.

Ngjarja e rëndë ndodhi pranë një shkolle katolike, në jug të qytetit.

Shefi i policisë, Michael O’Hara, gjatë një deklaratë për mediat tha se sulmuesi ishte i armatosur me tri armë, një pushkë automatike, një armë gjahu dhe një pistoletë.

Ai hapi zjarr në mënyrë të papritur, duke krijuar panik dhe viktima në pak sekonda.

Autoritetet konfirmojnë po ashtu se autori i sulmit ka ndërruar jetë.

“Dy fëmijë të vegjël, të moshës tetë dhe dhjetë vjeç, u vranë aty ku ishin ulur në banka. Prindërit e tyre janë njoftuar për humbjen tragjike,” tha O’Hara, i cili e cilësoi sulmin si akt brutal.

Në total, sipas autoriteteve, 17 persona janë plagosur, prej të cilëve 14 janë fëmijë, dy prej të cilëve ndodhen në gjendje kritike.

Ngjarja ka shkaktuar reagime të ashpra në mbarë vendin.

Presidenti Donald Trump ka reaguar menjëherë pas sulmit të rëndë në një shkollë katolike në Minneapolis, ku dy persona humbën jetën dhe mbi 20 të tjerë u plagosën.

Trump njoftoi se agjentët e FBI-së janë aktualisht në vendin e ngjarjes dhe theksoi se reagimi ndaj incidentit ka qenë i shpejtë dhe i koordinuar.

Sulmi me armë në një shkollë SHBA: Dy fëmijë

Një dëshmitar okular përshkroi momentet e tmerrshme që ndoqën sulmin me armë zjarri, duke treguar për SkyNews se ka dëgjuar rreth 30 deri në 50 të shtëna. Ai tha se zërat e armëve ishin sporadikë dhe ngjanin me ato të një pushke.

“U trondita shumë. Të shtënat ndodhën në mënyrë të shpërndarë dhe ishin të forta,” rrëfeu dëshmitari.