1 vit pasi u ndalua, procesi i vetingut në radhët e policisë, do të rikthehet. Afati i fundit për dorëzimin e formularëve të deklarimit është më 10 Mars. Këtij procesi të rëndësishëm për vazhdimësinë në radhët e uniformave blu do t’i nënshtrohen rreth 300 efektivë, të cilët do të skanohen nga AMP.
Ndryshe nga ligji i vjetër i vetingut, ku procesin e vlerësimit do duhet ta kalonte e gjithë trupa policore, me ndryshimet e reja është krejt e kundërta. Kështu nga rreth 12 mijë punonjës policie, procesit të vetingut do t’i nënshtrohen rreth 300 efektivë.
Konkretisht do të vlerësohen drejtorët e drejtorive qendrore në Policinë e Shtetit, Drejtuesit Vendorë, Zëvendës drejtorët për sigurinë dhe hetimin e krimeve, shefat e sektorëve, ato të qarkullimit rrugor dhe shefat e komisariateve në të gjithë vendin.
Më parë nën efektet e ligjit për vlerësimin kalimtar të miratuar në 2019, u vetuan 37 drejtues të lartë të policisë, nga të cilët 35 prej tyre u konfirmuan në detyrë.
o.j/dita
