Ndalohen në Rinas dy shtetase, të cilat tentuan të nxirrnin nga Shqipëria 40 mijë euro duke i fshehur në trup.
Pas kontrolleve të kryera, policia bën me dije se nënë e bijë, përkatësisht të moshave 66-vjeç dhe 43-vjeç, kishin fshehur në trup secila nga 20 mijë euro, me qëllim mosdeklarimin e tyre konform ligjit.
Policia ka sekuestruar shumën prej 40 mijë eurosh dhe dokumentin e falsifikuar, në cilësinë e provës materiale. Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Tiranë, për veprime të mëtejshme.
Po sipas burimeve zyrtare të policisë, është ndaluar edhe një një 35-vjeçare, e cila gjatë kryerjes se procedurave në aeroportin e Rinasit, teksa udhëtonte së bashku me djalin e saj 16-vjeçar, ka paraqitur një deklaratë noteriale të falsifikuar.
“U referuan materialet në Prokurori ku nisi procedimi në gjendje të lirë për shtetaset S. S., 66 vjeçe dhe E. K., 43 vjeçe (nënë e bijë), të dyja banuese në Tiranë, pasi gjatë kontrolleve fizike, shërbimet e Policisë i gjetën secilës prej tyre, 20 000 euro të fshehura në trup, me qëllim mosdeklarimin konform ligjeve në fuqi. U referuan materialet në Prokurori ku nisi procedimi në gjendje të lirë për shtetasen M. H., 35 vjeçe, banuese në Dibër, pasi gjatë kryerjes se procedurave në aeroportin e Rinasit, teksa udhëtonte së bashku me djalin e saj 16-vjeçar, ka paraqitur një dokument (deklaratë noteriale) të dyshuar të falsifikuar”, thuhet në njoftimin zyrtar të policisë.
p.k\dita
