Një ditë pas sulmit amerikan në Venezuelë dhe kapjes së Nicolas Maduro dhe gruas së tij, sekretari i Shtetit Marco Rubio thotë se SHBA nuk është në luftë me Venezuelën, por është “kundër organizatave të trafikut të drogës”.
Në një intervistë për NBC, Rubio tha se administrata Trump nuk e informoi Kongresin për operacionin ushtarak në Venezuelë sepse nuk ishte një pushtim.
“Nuk ishte e nevojshme sepse ky nuk ishte një pushtim”, deklaroi ai, duke e përshkruar kapjen e udhëheqësit venezuelian Nicolas Maduro si një “operacion të zbatimit të ligjit” dhe duke shpjeguar se ai u “arrestua në terren nga agjentë të FBI-së”.
Rubio tha se Delcy Rodriguez, e cila mori kompetencat e Maduros, nuk është “presidentja legjitime e Venezuelës”, pasi Shtetet e Bashkuara nuk e konsiderojnë legjitim regjimin që aktualisht është në pushtet në Karakas.
Rubio deklaroi se e kupton që sot në Venezuelë ka persona “që realisht mund të sjellin ndryshime”. Por ai theksoi se kjo është diçka krejt tjetër nga njohja e legjitimitetit të qeverisë venezueliane, e cila sipas tij duhet të vijë përmes një periudhe tranzicioni dhe zhvillimit të zgjedhjeve të lira.
Nga ana tjetër, ministri i Mbrojtjes së Venezuelës, Vladimir Padrino López, deklaroi se autoritetet venezueliane e refuzojnë “rrëmbimin frikacak të presidentit kushtetues dhe komandantit të përgjithshëm” Nicolas Maduro dhe se, në respektim të vendimit të Gjykatës Supreme, e njohin emërimin e Delcy Rodríguez si presidente.
Padrino pretendoi se një pjesë e madhe e ekipit të sigurisë së ish-presidentit Maduro u vra gjatë operacionit amerikan që çoi në kapjen e tij të shtunën. Ai nuk dha një shifër të saktë për numrin e viktimave, por tha se u vra edhe roja e sigurisë së Maduros. New York Times raporton se 80 persona mbetën të vrarë nga sulmi amerikan.
Ndërkohë, presidenti amerikan Donald Trump paralajmëroi drejtpërdrejt Delcy Rodríguez, duke deklaruar se nëse ajo “nuk bën atë që është e drejtë, do të paguajë një çmim shumë të lartë, ndoshta më të lartë se ai i Maduros”.
Lidhur me të ardhmen e Venezuelës, ai tha për median amerikane The Atlantic se “ndryshimi i regjimit, sido që të doni ta quani, është më i mirë se ai që keni tani. Nuk mund të bëhet më keq”.
“Bej gjën e duhur..” do të thotë: Bëj si them unë?