Ish-drejtoresha Alda Klosi dhe sanitarja e shtëpisë së saj, Rozeta Dobi u ballafaquan me njëra-tjetrën në Prokurorinë e Tiranës.
Për më pak se tre orë, të dyja gratë ia kanë drejtuar gishtin e akuzës njëra-tjetrës. Gjatë rimarrjes në pyetje, përballë njëra-tjetrës, edhe Klosi edhe Dobi këmbëngulin versionin paraprak që kanë dhanë në Polici.
Ish-zyrtarja i qëndron alibisë se shumën prej 120 mijë euro e 30 mijë dollarë ia vodhi Rozeta Dobi, të cilën e kishte punësuar prej pesë vitesh. Por, sanitarja ka insistuar se jo vetëm që këtë shumë ja kishte besuar shefja Klosi për t`ia ruajtur, por edhe vlerën prej 400 mijë euro-ve të gjetura në aspiratorin e kuzhinës i përkasin Alda Klosit.
Klosi tha se shumën prej 400 mijë eurosh nuk e di se si e ka gjetur sanitarja dhe kujt i përkasin.
Po ndërsa Klosi nuk justifikon dot as shifrën e 120 mijë eurove për t’ua gjetur burimin, Prokuroria tha se një biznesmen ka deklaruar se i ka dhënë borxh, por edhe ky qëndrim mbetet i dyshimtë për akuzën dhe pritet të verifikohet, pasi borxhi pretendohet t`i jetë dhënë vëllait të Aldës, borxh të cilin ai nuk e deklaroi në dëshminë e tij të mëhershme.
Ballafaqimi vjen pas dëshmive kontradiktore të dhëna prej Alda Klosit dhe Rozeta Dobit, veç e veç, dhe thënieve të vëllait të ish-zyrtares së lartë për shumën e 120 mijë eurove.
Më 7 janar 2023, Rozeta Dobi dhe djali i saj Havier Dobi ranë në pranga me akuzën e vjedhjes, pas denoncimit të Alda Klosit. Ata u përgjuan në ambientet e policisë ku flisnin për shumën mbi 400 mijë euro të fshehur në tubin e aspirimit në shtëpinë e tyre, tha policia.
Pas kontrollit tjetër, shuma u gjet në banesën e sanitares ndërkohë që një pjesë tjetër të parave, ajo dhe djali i saj i kishin shpenzuar për blerje të ndryshme përfshirë edhe një makinë luksoze të cilën i riu e ekspozonte në rrjetet sociale.
Vlera totale e vjedhur në vlerën e rreth 500 mijë eurove u bë shkak për nisjen e hetimit për burimin e këtyre parave.
j.l./ dita
