Policia e Kavajës merr dëshminë e parë të autorit të dyshuar Habib Rexha, i cili akuzohet se ekzekutoi Ardian Gosën në lokal të dielën, teksa pinte kafe me të atin. Ai thotë se shoqëruesi i tij nuk ishte fare në dijeni për ngjarjen, ndërsa u shpreh se e gjitha ka ardhur nga gjaknxehtësia, pasi po e përjetonte keq vrasjen e vëllait, duke kryer hakmarrjen.
“Isha pranë një kinkaleria bashkë me një shokun tim. Pashë që shënjestra ka qenë ulur në lokal. Pashë atë dhe ika 300 metra larg. Lashë makinën atje dhe u ktheva në këmbë. Armën e mbaja me vetë. Shoku nuk ka qenë në dijeni. E pashë rastësisht në kafe dhe veprova nga gjaknxehtësia. U largova bashkë me shokun nga Durrësi, me drejtim Kukësin”, mësohet të ketë thënë Habib Rexha. Por nuk i ka bindur hetuesit, pasi nuk shpjegoi dot mbajtjen e armës pistoletë dhe vërdallosjen në Kavajë.
