Prokuroria e Posaçme (SPAK) lexoi konkluzionet përfundimtare për ish-shefin e Qarkullimit Rrugor, Roven Zeka, duke kërkuar dënimin e tij me 4 vite burg. Për shkak të gjykimit të shkurtuar, prokuroria kërkoi që dënimi të ulet në 2 vite e 8 muaj dhe të konvertohet në 3 vite shërbim prove.
Për ish-shefin e Hetimit të Aksidenteve, Sokol Novakun, SPAK kërkoi të njëjtin dënim.
Ndërsa për Bledi Belbën, prokuroria kërkoi dënimin me 1 vit e 6 muaj burg, pezullimin e dënimit dhe konvertimin e tij në shërbim prove.
Për oficerin e OPGJ-së, Edison Tabaku, organi i akuzës kërkoi deklarimin fajtor dhe dënimin me 5 vite burg, si dhe uljen e një të tretës së dënimit për shkak të procedurës së shkurtuar.
Sa i përket Ergest Vrionit, i cili i dha një shumë parash Edison Tabakut për të fshehur aksidentin me 5 të plagosur, SPAK kërkoi dënimin me 2 vite burg. Për shkak të gjykimit me procedurë të shkurtuar, dënimi të ulet në 1 vit e 4 muaj dhe të pezullohet, duke e vendosur Vrionin në shërbim prove për këtë periudhë.
SPAK kërkoi gjithashtu konfiskimin e parave që iu dhanë Edison Tabakut. Hetimet treguan se Zeka, në bashkëpunim me dy ish-zyrtarë të policisë, kanë marrë para nga Ergest Vrioni, në mënyrë që aksidenti i shkaktuar nga bashkëshortja e tij, Anisa Vrioni, të mos referohej në prokurori dhe të mos nisnin hetimet.
Sipas prokurorisë, u kërkuan 2000 euro me qëllim që Anisa Vrioni të mos arrestohej për shkaktimin e aksidentit me disa të plagosur, ndërsa paratë u kërkuan të jepeshin në mënyrë të menjëhershme.
Personat që i kanë dhënë shumën e parave Edison Tabakut kanë qenë Ergest Vrioni dhe Bledi Belba.
j.l./ dita
