Nga Orgen Peci
Një orë luksoze ngjyrë e bardhë, tërhoqi vëmendjen në pamjet e arrestimit të biznesmenit Ergys Agasi. Ora i përket modeleve luksoze të Richard Mille, mes tyre edhe seria RM 61-01 Yohan Blake.
Nga fotografia, ora që mban në dorë Agasi përkon pikërisht me modelin më poshtë, që sipas kërkimeve në internet kushton deri në 300 mijë euro.
Por gama e Richard Mille përfshin edhe ora shumë më të shtrenjta. Modelet më ekskluzive, veçanërisht ato tourbillon dhe edicionet e kufizuara, mund të kalojnë 1 milion euro, ndërsa disa prej tyre arrijnë në treg rreth 2 milionë euro ose më shumë.
Përpara arrestimit të Agasit, në Francë u arrestua bashkëpunëtori i tij më i ngushtë Ermal Beqiri në Francë, teksa shëtiste në qiell me një avion privat. Kjo shënoi një nga zhvillimet më goditëse lidhur me hetimet e Prokurorisë së Posaçme (SPAK) mbi procedurat e tenderave publikë dhe abuzimet me fondet e teknologjisë (AKSHI).
Ndaj fotoja e Agasit (për publikimin e së cilës pati masa disiplinore në polici) me një orë luksoze të tipit Richard Mille, përmbledh kontrastin e fortë mes fondeve publike të zbrazura dhe luksit të shfrenuar që do të zbardhej më pas nga kërkesat e drejtësisë për sekuestrimin e pasurive.
Për Beqirin avioni ishte vetëm një nga elementët që tërhoqi vëmendjen. Hetimet financiare zbuluan se vetëm në Francë, ai kishte blerë një kështjellë 1,200 metra katrorë me një vlerë prej 2.6 milionë eurosh në departamentin Oise. Përveç kështjellës, autoritetet franceze dhe SPAK-u identifikuan llogari bankare me mbi 2 milionë euro cash, si dhe apartamente e mjete motorike luksoze të blera jashtë Shqipërisë.
Sipas Prokurorisë së Posaçme, Ermal Beqiri dhe Ergys Agasi janë vënë nën akuzë si pjesë e një grupi të strukturuar kriminal që diktonte fituesit e tenderave në fushën e teknologjisë së informacionit përmes presionit, paracaktimit dhe trukimit me paranë publike.
DITA
