Sanchez në Tiranë, Rama reagon për tensionet në veri të Kosovës, thirrje Vuçiçit: Po ushtrohet sovraniteti

Kryeministri Rama ka çelur konferencën që po mban së bashku me kryeministrin spanjoll, Pedro Sanchez, i cili ndodhet në Tiranë.

Rama e falënderoi publikisht dhe u shpreh se Spanja ka qenë një nga aktorët më të zëshëm në procesin e integrimit për Shqipërinë dhe Maqedoninë e Veriut.

Ai theksoi se Shqipëria ka një pritshmëri të lartë nga Spanja e cila do të marrë presidencën në vitin 2023.

“Pas hapit historik të çeljes së negociatave për anëtarësim në BE, na vjen mirë dhe dëshiroj që publikisht ta falenderoj Pedron për mbështetjen pa rezervë të Spanjës në këtë proces. Kujtoj që Spanja kishte një pozicion më të ngurtë se disa të tjerë duke qenë në njëfarë mënyre më kërkuese dhe sot Spanja është tërësisht e angazhuar në mbështetje të këtij procesi dhe ka qenë një nga aktorët për të zëshëm për të çelur negociatat me Shqipërinë dhe Maqedoninë e Veriut. Ne kemi një pritshmëri nga Spanja e cila do të udhëheqë presidencën në 2023. Kemi folur me kryeministrin për rajonin të cilin ai po e viziton, për nismat rajonale, për mënyrën se si mund ta integrojmë këtë proces nismash rajonale me procesin që nis me idenë e komuniteti të ri politik evropian”, tha Rama.

Gjatë konferencës, Rama reagoi për herë të partë për tensionet në veri të Kosovës.

Ai tha se Kosova ka të drejtë të zbatojë marrëveshjet e reciprocitetit dhe i bëri thirrje presidencës serbe që mos të justifikojë veprimet e grupeve të caktuara në veri të Kosovës.

“Kemi folur për Kosovën, dihet që Spanja ka një pozicion të ndryshëm për arsye qe lidhen me vetë Spanjën dhe nuk kanë të bëjnë me asnjëlloj diskriminimi apo paragjykimi ndaj bashkësisë së shqiptarëve në Kosovë dhe ndaj së drejtës së tyre, por ne kemi diskutuar aq më tepër në kuadrin e një situate që mbrëmë vonë ka pasur një përshkallëzim krejtësisht të paarsyeshëm, pasi qeveria e Kosovës ka të drejtën dhe detyrën që të zbatojë marrëveshjet duke ushtruar sovranitetin territorial që buron nga një pavarësi në administrimin e shtetit dhe marrëveshjet e dakordësuara me palën tjetër janë marrëveshje për t’u zbatuar. Ne e përshëndesim shtyrjen me 30 ditë të zbatimit të kësaj marrëveshje. I bëj thirrje autoriteteve në Beogard që të mos ushqejnë me asnjëlloj justifikimi apo alibie grupe të caktuara në veri të Kosovës që për arsyet e tyre i kundërvihen zbatimit të një marrëveshjeje”, tha Rama.

j.l./ dita