Bashkëkryesuesit e Grupit për Çështjet Shqiptare në Senatin e SHBA, dy senatorët Joni Ernst dhe Gary Peters i kanë dërguar Sekretarit të Shtetit të SHBA, Antony Blinken një letër ku flasin për Luginën e Preshevës dhe kauzën e drejtë të shqiptarëve etnikë atje.
Në një postim në rrjete sociale, anëtari i bordit të Ligës Qytetare Shqiptaro-Amerikane Faton Bislimi ka publikuar letrën e dy senatorëve, të cilët i kërkojnë Sekretarit të Shtetit që të hapë temën e çështjes shqiptare në Luginë në secilin komunikim apo takim me autoritetet serbe.
Në letër gjithashtu kërkohet realizimi i Planit Shtatëpikësh për të drejtat shqiptare në Luginë i pranuar edhe nga Serbia që në vitin 2013.
“Letra potencon faktet tanimë të vërtetuara ndërkombëtarisht – qoftë përmes Raporteve të vet Departamentit të Shtetit apo edhe Rezolutës së Parlamentit Evropian të Majit 2023 — për diskriminimin shtetëror ndaj shqiptarëve në Luginë, me theks të veçantë, pasivizimin e adresave si metodë administrative e spastrimit etnik. Që nga ajo kohë, qeveria në Beograd ka bërë progres të limituar në implementimin e këtij plani. Asnjë nga pikat prioritare të planit nuk është realizuar në tërësi, e tek përfaqësimi në institucione qeveritare, nuk ka pasur aspak progres”, shkruan Bislimi.
Letra e senatorëve vjen pak muaj pas letrës së kongresmenëve Himes e Torres, po ashtu për Luginën, drejtuar Sekretarit Blinken.
j.l./ dita
