Të tjera sulme ajrore janë shënuar në Qeshm, Bandar, Abbas e portin e Sirik në Ngushticën e Hormuzit. Mediat iraniane raportuan për të paktën 6 shpërthime në ishullin Qeshm, zonë strategjike për kontrollin iranian të ngushticës, dhe të paktën 7 të tjerë në portin e Sirik.
Komanda qendrore e SHBA-së deklaroi se këto sulme janë kundërpërgjigje ndaj atyre iraniane që goditën 3 anije tregtare që po kalonin tranzit në Hormuz. Uashingtoni pohon se këto veprime përbëjnë agresion të pajustifikuar dhe shkelje të armëpushimit.
Sipas Gardës Revolucionare Iraniane, 85 instalime ushtarake amerikane u shënjestruan në Kuvajt dhe Bahrein në përgjigje të sulmeve amerikane në Ngushticën e Hormuzit. “Në përgjigjen e parë ndaj këtij agresioni”, tha një deklaratë e transmetuar nga televizioni zyrtar IRIB, “Marina dhe Forca Hapësinore e Korpusit të Gardës Revolucionare Islamike (IRGC) ndërmorën një operacion të përbashkët duke përdorur raketa dhe dronë, duke goditur 85 instalime strategjike ushtarake amerikane dhe duke rrëzuar një dron MQ-9”.
Përshkallëzimi vjen ndërsa negociatat midis Shteteve të Bashkuara dhe Iranit janë ende duke vazhduar për një marrëveshje përfundimtare pas konfliktit të muajve të fundit. Më parë, Departamenti i Thesarit i SHBA-së kishte revokuar gjithashtu një përjashtim të përkohshëm nga sanksionet që i lejonte Iranit të prodhonte, shiste dhe eksportonte naftë bruto deri më 21 gusht, duke rritur më tej presionin ekonomik mbi Teheranin.
Ministria e Jashtme iraniane deklaroi se Shtetet e Bashkuara kanë shkelur vazhdimisht memorandumin e mirëkuptimit të dakordësuar dhe paralajmëroi për hakmarrje pas sulmeve të Uashingtonit ndaj objektivave në Ngushticën e Hormuzit.
“Irani lëshon një paralajmërim serioz në lidhje me pasojat e shkeljes së traktatit nga Shtetet e Bashkuara dhe do të marrë masa vendimtare për të mbrojtur interesat dhe sigurinë e saj kombëtare”, tha Ministria.
j.l./ dita
