Hetimet dhe arrestimet për korrupsion kanë një rritje të dukshme kohët e fundit. Për disa kjo tregon nivelin e lartë të korrupsionit, por ky nuk është lajm i ri në Shqipëri. Korrupsioni në administratë nuk lindi sot; ata që ulërijnë sot kundër tij, janë të korruptuarit e djeshëm. Dhe çfarë korrupsioni! Nga ai që hidhte në erë fshatra të tërë me gra e fëmijë.
Pra, njëri problem i madh i trajtimit të fenomenit sot është mungesa e plotë e moralit tek ata që kanë politikisht flamurin e antikorrupsionit. Morali nuk është freskore që mund ta hapësh apo mbyllësh sipas diellit politik. Për disa mund të jetë, por për shumicën, veprat e hajdutërisë janë aty, hajdutët e djeshëm dihen, me emër e me prova.
Atëherë, çfarë ka ndryshuar sot?
Korrupsioni ka vijuar, por ajo që opinioni publik duhet ta veçojë me shpresë dhe ta gjykojë me durim dhe maturi është forcimi i institucioneve të Drejtësisë. Kjo e fundit, pavarësisht se nuk ka arritur ende tek pritshmëritë e Reformës, ka shenja të qarta të ndryshimit.
Dihet botërisht se krahas Gjykatave një nga institucionet më të rrënuara profesionalisht, ka qenë Prokuroria. Veçanërisht vitet e fundit kur u drejtua nga A.Llalla, ky institucion shënoi një nga pikat më kritike të rënies në tre dekadat e fundit.
Në të gjithë vitet e ushtrimit të detyrës së tij ish-kryeprokurori, më tepër si njeriu i ligjit, u njoh si tabori rezervë i politikës, mbështetësi i verbër i betejave të humbura, deri sa kaloi në grotesk, duke hapur luftë në fund edhe me Departamentin e Shtetit.
Asnjë drejtues prokurorie nuk ka qenë kaq i lidhur me shefat e tij politikë, dhe asnjë kaq verbërisht nuk i ka mbështetur ato në një luftë të pafund politike, duke përdorur të gjithë mekanizmat e sistemit të drejtësisë për të ruajtur të paprekur një kupolë mafioze në kreun e shtetit dhe të qeverisë.
Reforma solli SPAK-un dhe gjithë prozhektorët u drejtuan aty. Por disa arrestime të kohëve të fundit dëshmojnë se Prokuroria e Përgjithshme dhe ajo e Tiranës, kanë rigjetur shinat e seriozitetit profesional, nga të cilat kishin dalë rrëmujshëm gjatë katrahurës së llallizmit.
Veçanërisht hetimi i fundit dhe arrestimi i djeshëm në kupolën e financave (lexo KËTU) dëshmojnë se kur ka vullnet dhe ndershmeri, bëhet “SPAK” i gjithë sistemi.
Ky është një lajm i mirë dhe i mezipritur.
Kreu i Prokurorisë së Përgjithshme, Olsian Çela dhe ai i Prokurorisë së Tiranës, Arenc Çela meritojnë mbështetjen e plotë të publikut në këtë përpjekje për ta rikthyer te interesat e qytetarit këtë institucion kyç të drejtësisë së re.
Vonesa? Më mirë vonesa sot dhe institucione të forta nesër, se drejtësi e shitur, si dje.
Dita
