Kisha Katolike do të shpallë këtë të diel shenjtorin e parë të brezit “milenial” – Carlo Acutis, një djalë me origjinë italiane, i lindur në Londër në vitin 1991 dhe i ndarë nga jeta në vitin 2006, në moshën vetëm 15-vjeçare.
Acutis njihet si “Influenceri i Zotit”, për shkak të pasionit të tij për teknologjinë dhe përdorimit të saj për të përhapur mesazhin e fesë.
Ndryshe nga figurat tradicionale të shenjtorëve, Acutis ishte një adoleshent i kohëve moderne: i dhënë pas informatikës, programimit dhe ndërtimit të faqeve në internet.
Ai krijoi një arkiv virtual të mrekullive eukaristike dhe përdori rrjetin global si një platformë misionare. Në një kohë kur teknologjia shpesh shihet si faktor largues nga feja, Carlo e përdori atë për të afruar të rinjtë me Zotin.
Ai u diagnostikua me leucemi akute dhe e përballoi sëmundjen me një qetësi dhe besim të jashtëzakonshëm, duke ia kushtuar vuajtjet e tij Krishtit dhe Papës.
“Jo unë, por Zoti në mua”, është një nga thëniet e tij që ka frymëzuar miliona besimtarë.
Procesi i shenjtërimit nisi pas njohjes së një mrekullie të ndodhur pas ndërmjetësimit të tij. Mbetjet e tij u ekspozuan në Asizi, ku adhuruesit nga e gjithë bota i bënë nderime.
Shën Carlo Acutis përfaqëson një shenjtor të epokës sonë – të veshur me xhinse dhe atlete, me laptop në prehër dhe zemër të mbushur me besim.
Ai u kujton të rinjve se shenjtëria nuk është e kaluar, as e paarritshme, por mund të jetojë edhe në gjuhën dhe mjetet e brezit të teknologjisë.
Lajm interesant. “…i dhënë pas informatikës, programimit dhe ndërtimit të faqeve në internet”! Kjo është e tashmja dhe e ardhmja. Këtu duhet ta vejë theksin edhe ajo gjoja ministri arsimi që kemi. Tu mësojë të rinjve informatikën. Po ai djalë, aq i talentuar, paska qënë edhe shumë fetar! Një plus tjetër për të. Thuhet se të rinjtë në Perëndim po i rikthehen fesë. Dhe kishat kanë filluar të rimbushen. Por kësaj rradhe jo vetëm me pleq që duan të “sigurojnë” biletën për në parajsë, por edhe nga rinia, që gjen frymëzim dhe mbështetje në predikimet e Krishtit.