Ministrat dhe zyrtarët e lartë të shëndetësisë dhe përfaqësuesit e enteve publike dhe private nga 14 vende aziatike, afrikane dhe të Amerikës së Jugut, janë takuar në ‘CaixaForum Madrid’, për Forumin e dytë Global të Pneumonisë. Qëllimi? Nevojitet një përpjekje më e madhe për t’i dhënë fund mijëra vdekjeve që janë të shmangshme, mbi të gjitha, natyrisht, në vendet me të ardhura të ulëta, apo siç quhen ndryshe të ‘botës së tretë’. Një statistikë e kobshme u publikua në këtë forum: Çdo 42 sekonda, një fëmijë me pneumoni vdes në botë! Në këtë forum, përveç “La Caixa”, ishte prezent edhe Fondacioni “Bill & Melinda Gates”, UNICEF dhe “Save the Children”, që e kanë rifilluar këtë takim për të adresuar një nga sfidat më të mëdha në mbarë botën. Dhe shtetet që kanë më shumë viktima të fëmijëve nga kjo sëmundje janë; Nigeria, Somalia, Guinea, Etiopia, Indonezia, Peruja, India, Mozambiku. Pjësëmarrësit vunë theksin tek çështje madhore: vaksinimi në botë, mungesa e aksesit për fëmijët nga zonat më të pafavorizuara, e deri te një sistem shëndetësor i fuqishëm, i cili i mbron ata nga sëmundjet aq vdekjeprurëse si pneumonia.
