Mushkonjat që mbartin infeksione të rrezikshme janë zhvendosur në pjesë të reja të Evropës, duke rritur rrezikun e sëmundjeve.
Sipas ekspertëve, valët përherë e më të shpeshta të të nxehtit dhe përmbytjet, kanë krijuar kushte më të favorshme për insektet.
Masa më të mira për kontrolle dhe mbrojtje kundër mushkonjave janë bërë tashmë të domosdoshme
Një raport nga Qendra Evropiane për Parandalimin dhe Kontrollin e Sëmundjeve (ECDC), thotë se kjo qendër ka gjurmuar përhapjen e llojeve të ndryshme të mushkonjave që bartin dhe transmetojnë një numër të ndryshëm infeksionesh te njerëzit.
Këto përfshijnë Denga-n dhe Zika-n, të cilat shkaktojnë një sërë simptomash si ethe dhe dhimbje muskujsh. Në rastet më të këqija, i bëjnë njerëzit të ndihen jashtëzakonisht të sëmurë.
Raporti i ECDC thekson se këtë vit, mushkonja Aedes Albopictus (e njohur si bartëse e Denga-s dhe Chikungunya) “u vendos” në 13 vende të reja në Evropë.
Kjo do të thotë se ka zhvilluar një popullsi të vetëqëndrueshme që po riprodhohet krahasuar me tetë vende evropiane ku ka qenë e pranishme deri një dekadë më parë.
Ndërkohë, vitin e kaluar, Aedes Aegypti, i cili mund të përhapë sëmundje si ethet e verdha, Zika dhe virusi i Nilit Perëndimor, u shfaq edhe në Qipro.
Shkencëtarët paralajmërojnë se mund të vazhdojë të përhapet në vende të tjera.
Andrea Ammon, drejtor i ECDC, tha se vitet e fundit kemi parë një përhapje gjeografike të mushkonjave helmuese në zonat e paprekura më parë në BE/EEA.
“Nëse kjo vazhdon, ne mund të presim të shohim më shumë raste dhe ndoshta vdekje nga sëmundje të tilla. Përpjekjet duhet të përqendrohen në mënyrat për të kontrolluar popullatat e mushkonjave, duke rritur mbikëqyrjen dhe zbatimin e masave mbrojtëse personale”, ka thënë ai.
Në lidhje me këtë ekspertët rekomandojnë eliminimin e burimeve të ujit ku shumohen mushkonjat dhe përdorimin e larvicideve miqësore me mjedisin, krahas rritjes së ndërgjegjësimit për masat personale që njerëzit duhet të marrin për të mbrojtur veten.
p.k. / dita
