Dy operacione antidrogë janë zhvilluar dje në Shkodër, ku janë arrestuar 7 persona dhe sekuestruar 5,6 kg kanabis sativa. Gjatë operacionit të koduar “Bleran”, burime zyrtare bënë me dije se u arrestuan Pjetër Ashta dhe Dodë Ashta. Ndërsa gjatë operacionit policor “Sheshi”, u arrestuan; Artilas Vuksani, Emiljan Vuksani, Robert Pepniku, Robert Preka dhe Rajmond Kola. Dy operacionet janë zhvilluar gjatë 12 orëve të fundit, kundër grupeve të shpërndarjes së lëndëve narkotike.
Policia sqaroi se në banesën e Pjetër dhe Dodë Ashta, babë e bir, në fshatin Bardhaj, janë gjetur 5.6 kg kanabis sativa, e cila u sekuestrua bashkë me 2 celularë. Nga veprimet hetimore dyshohet se këta persona ushtronin aktivitetin kriminal të shpërndarjes së lëndëve narkotike në doza, në qytetin e Shkodrës. “Vijojnë veprimet hetimore për dokumentimin e plotë të aktiviteteve kriminale të këtyre shtetasve. Materialet i kaluan Prokurorisë, për veprime të mëtejshme”, thuhet në njoftimin zyrtar të policisë vendore. Ky aksion vjen edhe pas takimit të zhvilluar në Prefekturë të Task-Forcës Antikanabis.
