Hartuesi i programit ekonomik të kandidatit Këlliçi, Klodian Muço, ka deklaruar se rruga për të bërë transportin falas në kryeqytet, është shkurtimi i vendeve të punës në Bashkinë e Tiranës.
Duke folur në ‘Report tv’, këshilltari ekonomik i Këlliçit nënvizoi se shumë punonjës aktualë të administratës në Bashki duhen hequr, pasi sipas tij ‘e marrin rrogën kot!’.
“Buxheti i Bashkisë së Tiranës, shkon për pagat dhe shpenzime të administratës. Janë njerëz që marrin një rrogë kot. Si do e financojmë, do shkurtojmë shpenzimet administrative, do ketë reformë. Kemi bërë me laps dhe me letër, kaq na kushton, tani, kaq më vonë dhe ku do të dalin paratë”, tha Muço.
Një studim i kryer në vitin 2022 nga ekspertët gjermanë të GIZ-it – Agjencia Gjermane për Zhvillim- vuri në dukje se kostoja që duhet për të realizuar transport publik falas, duke përfshirë edhe përmirësimet e nevojshme, varion nga 91.5 milionë euro, deri në 114.1 milionë euro. Një shifër, e cila është e papërballueshme sot nga financat e Bashkisë së Tiranës.
