Pas një alarmi të ngritur për shkak të lëshimit të raketave iraniane, shpërthime të forta u dëgjuan në Jerusalem. CNNgr shkruan se, shpërthime u raportuan edhe në Doha, kryeqytetin e Katarit, si dhe në Dubai, në Emiratet e Bashkuara Arabe, ndërsa vazhdojnë hakmarrjet iraniane ndaj sulmeve masive ajrore nga Shtetet e Bashkuara dhe Izraeli.
Sipas mediave lokale në Izrael, sirenat u dëgjuan në të gjithë Izraelin qendror mes një sulmi me raketa balistike iraniane. Në të njëjtën kohë, një alarm paralajmërues për një ndërhyrje të dyshuar me dron u aktivizua në Galilenë e Epërme dhe në Lartësitë e Golanit. Forcat Mbrojtëse të Izraelit (IDF) njoftuan se po punojnë për të kapur raketat.
Izraeli dhe Hezbollahu në Liban kanë shkëmbyer zjarr ndërsa konflikti me Iranin zgjerohet.
Ministria libaneze e shëndetësisë thotë se sulmet izraelite në Bejrut dhe në Libanin jugor kanë vrarë të paktën 31 persona dhe kanë plagosur 149 të tjerë.
Ndërkohë, Shefi i Shtabit të Përgjithshëm të Forcave të Mbrojtjes së Izraelit (IDF), Eyal Zamir ka paralajmëruar se përplasjet mund të zgjasin për disa ditë dhe kërkoi gatishmëri të lartë operacionale.
Sa i përket operacionit amerikan kundër Iranit, Presidenti i SHBA-ve, Donald Trump ka deklaruar se do të zgjasë “katër javë ose më pak”.
Gjithashtu edhe Izraeli është nën sulm, pasi një raketë iraniane goditi dje një pallat banimi, duke vrarë nëntë persona.
Teksa Lindja e Mesme po “zien”, Teherani vazhdon hakmarrjen kundër vendeve që i konsideron armiqësore: shpërthime janë raportuar në të gjithë Gjirin Persik, përfshirë Emiratet e Bashkuara Arabe dhe Katar. Ndërkohë, Mbretëria e Bashkuar, Franca dhe Gjermania janë shprehur “të gatshme për veprime mbrojtëse”.
Gjithashtu, një kolonë tymi e dendur po ngrihet nga zona ku ndodhet ambasada amerikane në Kuvajt dhe zjarrfikësit kanë nxituar në zonë dhe po punojnë, tha një dëshmitar okular për agjencinë e lajmeve Reuters. Mediat e huaja shkruajnë se, kompania KIPIC e Emirateve njoftoi se një mjet ajror pa pilot goditi një rafineri, duke plagosur dy punëtorë. Më parë, autoritetet thanë se mbrojtja ajrore kishte kapur një numër të paspecifikuar dronësh.
j.l./ dita
