Shqipëria i beson përvojës italiane, kush do të jetë trajneri i ri i Kombëtares

Italiani Rolando Maran është trajneri i ri i Kombëtares së Shqipërisë, duke marrë drejtimin e kuqezinjve pas një periudhe rreth një viti pa angazhim në pankinë.

Ishte vetë presidenti i FSHF-së, Armando Duka, që e prezantoi 62-vjeçarin të martën në një konferencë të përbashkët për shtyp, ku mori pjesë edhe ish-trajneri Sylvinho, të cilin e falenderoi për kontributin e tij në drejtimin e kuqezinjve.

Për rreth një vit, tekniku Rolando Maran ka qenë pa skuadër, ndërsa tani Federata Shqiptare e Futbollit i ka besuar drejtimin e Kombëtares, me synimin për të sjellë stabilitet dhe përvojë në pankinën kuqezi.

Presidenti Duka tha se objektivat e Kombëtares janë vendi i parë në Nations League, si dhe kualifikimi për Euro 2028, ndërsa më pas synimi do të jetë vazhdimi i rrugëtimit për të qenë pjesë e Botërorit 2030.

Maran, i lindur më 14 korrik 1963 në Itali, është një trajner me përvojë të gjatë në futbollin italian, si në Serie A ashtu edhe në Serie B. Ai ka qenë më parë edhe futbollist, ku karrierën si mbrojtës e ka zhvilluar kryesisht te Chievo Verona, klub me të cilin ka kaluar një pjesë të rëndësishme të viteve si lojtar.

Pas tërheqjes nga futbolli aktiv në vitin 1997, Maran nisi menjëherë karrierën si trajner, fillimisht në sistemin e të rinjve te Chievo, më pas duke kaluar në klube si Brescia, Cittadella, Bari, Triestina dhe Vicenza në Serie B. Ai u bë më i njohur në elitën e futbollit italian gjatë drejtimit të Catanias, ku në sezonin e parë arriti një renditje historike në vendin e 8-të në Serie A, duke regjistruar një nga sezonet më të suksesshme të klubit.

Më pas, Maran ka drejtuar edhe Chievon për disa sezone në Serie A, si dhe Cagliarin, ku në fillim arriti rezultate të mira dhe e vendosi skuadrën përkohësisht në garë për zonat europiane, por më pas rezultatet ranë. Ai ka pasur gjithashtu një eksperiencë te Genoa dhe Pisa, ndërsa angazhimi i tij i fundit ishte te Brescia, ku u largua në fund të vitit 2024.

Maran njihet për stilin e tij të organizuar taktikisht dhe për punën e kujdesshme me skuadrat në fazën mbrojtëse, ndërsa mbetet për t’u parë se si do të përshtatet me futbollin dhe objektivat e Shqipërisë në ndeshjet e ardhshme ndërkombëtare.

Rolando Maran, ka falenderuar presidentin e FSHF-së, Armand Duka, për mundësinë e dhënë për të drejtuar kuqezinjtë, duke theksuar se e konsideron një përgjegjësi të madhe dhe një privilegj.

Ai gjithashtu ka shprehur mirënjohje për ish-trajnerin Sylvinho, për fjalët dhe kontributin e tij gjatë këtyre viteve në drejtimin e Kombëtares, duke theksuar se e ka ndjekur nga afër ecurinë e ekipit dhe se i jep komplimentet e tij për punën e bërë.

“Falenderoj presidentin Duka që më jep mundësinë të trajnoj një kombëtare që përfaqëson një popull me krenari të madhe. Të jesh afër Shqipërisë dhe tifozëve të saj është diçka që e kam perceptuar gjithmonë si një lidhje të fortë me krenarinë dhe pasionin e tyre.

Premtimi im është të transferojmë këtë dashuri për fanellën në fushë, duke dhënë maksimumin nga unë dhe nga stafi që do të punojë me mua. Do të jetë një angazhim moral dhe profesional i madh.

Ky është një mision që e ndjej fort nga brenda dhe dua që në fushë të reflektohet ajo që përfaqësoni ju, tifozët dhe i gjithë kombi.”

j.l./ dita