Shqipëria është kualifikuar në finalen e Eurovision 2023. Pas performancës plot emocion në gjysmëfinale, Albina dhe familja Kelmendi ia dolën që të çojnë vendin tonë në finalen e madhe ku do të performojnë në gjuhën shqipe këngën ‘Duje’.
Albina dhe familja Kelmendi përfaqësuan Shqipërinë me një performancë madhështore në skenën e Eurovisionit në Liverpool. Në këtë natë të dytë të gjysmëfinales, kënga me titullin ‘Duje’ u performua në gjuhën shqipe dhe ishte e 14-ta në radhë. Skenografia ishte përshtatur me ngjyrat kuqezi ndërsa nuk mungoi edhe flamuri kuqezi. Performanca plot emocion e familjes Kelmendi rrëmbeu duartrokitjet e të pranishmëve në sallë. Ata ia dolën që të çojnë Shqipërinë në finale dhe do të performojnë sërish në gjuhën shqipe më 13 maj para miliona teleshikuesve.
