Nga Dorin Xhima / DITA Sport
Pasi përfundoi kualifikueset me një paraqitje solide dhe me një grup të bashkuar, Shqipëria hyn në playoff-in e Botërorit me një sfidë të madhe përpara: Poloninë. Një kundërshtar me eksperiencë të gjatë në kompeticione të mëdha, me lojtarë që luajnë në kampionatet më konkurruese të Europës, por edhe me një cikël të brishtë që ka pasur luhatje të konsiderueshme në dy vitet e fundit.
Po si paraqiten shanset numerikisht? Portale statistikore dhe modele probabiliteti që simulojnë ndeshjet bazuar në formë, rankime dhe rezultate të fundit i japin Shqipërisë rreth 30–35% shanse për të kaluar Poloninë. Ndërsa shanset totale për të prekur finalen e playoff-it dhe për t’u kualifikuar në Botëror qëndrojnë rreth 10–12%.
Këto numra nuk janë të pakapërcyeshëm. Janë shifra që tregojnë një duel të vështirë, por të hapur. Është një sfidë ku cilësia, momenti dhe detajet mund të bëjnë diferencën.
Polonia ka qenë e pranishme në dy Botërorët e fundit dhe në Euro 2024. Lojtarët e klasit të lartë: Lewandowski, Zieliński, Cash, Moder, Piatek janë elementë që vendosin ndeshje. Fuqia fizike dhe ritmi i lartë i lojës është një stil i tyre që shpesh i ka vështirësuar punën ekipeve të Ballkanit.
Megjithatë, Polonia së fundmi ka vuajtur rezultate jo stabile, ndryshime trajnerësh dhe mungesë koherence në lojë. Madje, në disa ndeshje delikate ka treguar dobësi në organizimin mbrojtës dhe presion.
Shqipëria ndoshta ka më shumë shanse se duket. Sylvinho ka krijuar një identitet të qartë loje me disiplinë, kompaktësi dhe tranzicion të shpejtë. Kemi një brez të artë në rritje: Bare, Asllani, Bajrami, Mitaj, Hoxhallari, Broja, Seferi. Janë lojtarë teknikë, të shpejtë dhe të aftë të përballen me presionin.
Gjithashtu kemi një formë të mirë mbrojtëse. Shqipëria gjatë kualifikimeve ka qenë ndër ekipet me më pak gola të pësuar. Dhe ndryshe nga Polonia, Shqipëria hyn në ndeshje me një uri më të madhe, me një grup që beson se është në momentin e vet historik.
Shqipëria e fitoi duelin direkt me Poloninë gjatë eliminatoreve të Euro 2024 dhe e dominoi lojën në “Air Albania”. Kjo ka ndikim psikologjik. Polonia e di se Shqipëria nuk është më një kundërshtar i lehtë.
Për të kaluar Poloninë duhen 90 minuta pa gabime personale. Duhet neutralizim i mesfushës polake, që është zemra e lojës së tyre. Duhet shfrytëzim maksimal i kundërsulmeve, sulmuesit tanë duhet të jenë konkretë në zonën polake, ku ne zakonisht vuajmë.
Menaxhimi emocional është po ashtu me peshë sepse ndeshjet playoff vendosen shpesh nga presioni.
Përfundimisht ky është një mision i vështirë. Shqipëria nuk hyn favorite sipas statistikave të thata, por nuk ka qenë asnjëherë më e përgatitur se sot. Polonia është e fortë me emra, Shqipëria është e fortë me grup, ritëm dhe stabilitet.
Shqipëria e Sylvinhos ka treguar se mund ta krijojë momentin e vet.
—-
©️Copyright Gazeta DITA
Ky artikull është ekskluziv i Gazetës DITA, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar DITA dhe në fund të vendoset linku i burimit, sipas Nenit 178 të Ligjit Nr/ 35/2016
