Konsumimi i pijeve energjike, kafesë por edhe qëndrimi zgjuar në orët e vona, ndikojnë në shëndetin e zemrës. Mjekja kardiologe Manjola Lika thotë për Televizonin Klan se ky stil jetese i të rinjve po i bën ata të kenë çrregullim të ritmit të zemrës apo takikardi.
“Vitet e fundit është vënë re një shtim në frekuencë të rasteve që paraqiten te kardiologu. 20 -30 vjeçarët shpesh ankohen për çrregullime të ritmit të zemrës, konsumimi i tepërt i kafeve, çajit jeshil, pijet energjike, konsumimi i substancave narkotike, ndikojnë tek ky ritëm i shpeshtë.”
Fatmirësisht këto probleme sipas mjekes janë të trajtueshme nëse ndryshon stili i jetesës dhe kapen në kohë. Në të kundërt mund të bartin pasoja të mëdha.
“Aritmia mbart një rrezik për trompoza në organizëm dhe momenti që një trompozë ndodh, mund të shoqërohet me invalitizim dhe kur ndodh është e vështirë për ta llogaritur rikthimin në jetë normale.”
Mjekët rekomandojnë që të bëhet kujdes edhe me ushqyerjen, për të ndihmuar zemrën që të punojë normalisht. Sipas tyre, konsumimi i një vakti vetëm një herë në ditë, shkakton fryrje stomaku tek disa njerëz duke u pasur me një ritëm të shpeshtë të zemrës.
