Gjykata e Posaçme kundër Korrupsionit dhe Krimit të Organizuar ka shtyrë seancën për inceneratorin e Elbasanit për në 6 Korrik. Klan News raporton se të pandehurit kanë kërkuar kohë që të përgatisin mbrojtjen. Sipas të njëjtave burime, gjatë seancës së sotme ka bërë mbrojtjen vetëm Jonida Zeqo, e cila ka kërkuar pushimin e çështjes.
Kujtojmë se në seancën e sotme supozohej që të fliste mbrojtja e 9 të pandehurve për procesin e inceneratorin e Elbasanit. Ata akuzohen për korrupsion, shpërdorim detyre dhe pastrim parash.
Prokuroria e Posaçme ka kërkuar 57 vite burg për të akuzuarit.
SPAK kërkoi që ish-ministri i Mjedisit, Lefter Koka, Mirel Mërtiri dhe Klodian Zoto të dënohen me nga 10 vite burg. Për shkak të gjykimit të shkurtuar atyre u ulet 1/3 e dënimit dhe përfundimisht Prokuroria kërkoi 6 vite e 8 muaj burg.
Për Alqi Bllakon, Pëllumb Abeshin, Serafin Papën, Jonida Zeqon dhe Bardhyl Kabirin u kërkon nga 4 vite heqje lirie. SPAK në fund kërkoi dënimin për “shpërdorim detyre në bashkëpunim” me 2 vite e 8 muaj burg. Për administratoren e shoqërisë “Albtek Energy” sh.p.k Stela Gugallja, prokuroria kërkoi 7 vite burg që i ulet në 4 vite e 8 muaj heqje lirie.
