Për herë të parë gjatë këtij viti, maturantët që nuk janë të kënaqur me korrigjimin e provimeve të maturës, nuk do të mjaftohen vetëm me marrjen e kopjes së testit të vlerësuar, por do të mund të kërkojnë edhe rishikimin e notës.
Në rregulloren e provimeve të 2023 është përfshirë edhe risia e rivlerësimit të testeve, si për lëndët e detyruara, ashtu edhe për provimin me zgjedhje. Ministria e Arsimit dhe Sportit ka bërë me dije procedurat se si do të veprohet për të kërkuar rivlerësimin e testit për çdo rast kontestimi të notës.
Procedura që do të ndiqet:
Maturanti/kandidati ka të drejtë të kërkojë fotokopjen e testit, 1 ditë pas shpalljes së rezultateve paraprake të të gjitha provimeve.
Maturanti/kandidati pasi është pajisur me fotokopjen e testit, ka të drejtë ta paraqesë kërkesën për rivlerësim testi në komisionin shkollor të maturës shtetërore, ku është regjistruar si maturant, më datë 3 korrik.
Fotokopjet e testeve të paraqitura në këtë komision do të shqyrtohen nga dy mësues lëndor të përcaktuar nga komisioni (nëse një shkollë nuk ka dy mësues të lëndës shqyrtimi do të bëhet vetëm nga një mësues i lëndës).
Mësuesit e përcaktuar shqyrtojnë kërkesat e paraqitura nga maturantët/kandidatët vetëm për pyetjet e ankimuara dhe vendosin nëse këto teste do t’i kalojnë për rivlerësim QSHA.
Komisioni shkollor i maturës shtetërore, kërkesat për rivlerësim të miratuara nga mësuesit lëndor, i përcjell në zyrat vendore të arsimit parauniversitar në format elektronik, brenda datës 3 korrik dhe në format shkresor brenda datës 4 korrik.
Do të jenë këto zyra që , t’i përcjellin në format elektronik në QSHA kërkesat për rivlerësim brenda datës 3 korrik, si dhe zyrtarisht në format shkresor, brenda datës 5 korrik.
QSHA-ja kryen procesin e rivlerësimit të testeve, me të njëjtat rregulla e procedura si vlerësimi i testeve, duke i sekretuar me barkode testet që rivlerësohen. QSHA-ja kryen rivlerësimin e të gjithë testit.
Pas rivlerësimit, vlerësimi përfundimtar i maturantit mund të jetë:
- Me të njëjtin rezultat.
- Duke iu ndryshuar rezultati me rritje pikësh
- Duke iu ndryshuar rezultati me ulje pikësh.
Rezultatet përfundimtare të provimeve të maturës pas procesit të rivlerësimit shpallen jo më vonë se data 7 korrik.
p.k\dita
