Punimi i diplomës dhe provimi përfundimtar janë dy format me të cilat do të përmbyllen studimet e ciklit të dytë, qofshin këto programe të “Masterit profesional”, “Masterit shkencor”, apo edhe programe të integruara. Në një vendim të marrë së fundmi, Senati Akademik i Universitetit të Tiranës ka përcaktuar formën se si do të bëhet përmbyllja e studimeve të këtij cikli.
“Studimet e ciklit të dytë “Master i shkencave” do të përmbyllen me punim diplome dhe në përfundim të tyre do të lëshohet diplomë Master i shkencave në fushën e studimit të kryer. Ndërsa studimet e “Masterit profesional” do të përmbyllen me punim diplome ose me provim përfundimtar formimi, dhe në përfundim të tyre do të lëshohet diplomat përkatëse në fushën e arsimit të kryer”, detajohet në vendimin e kaluar nga Senati Akademik.
Kur detyrimi përmbyllës i programit të studimeve të ciklit të dytë bëhet me punim diplome, ky punim do të përllogaritet me numër kreditesh sipas kuadrit ligjor që rregullon elementet e programeve të studimit të ofruara nga universiteti, të cilat janë të përcaktuara edhe në planin mësimor. Edhe për studimet Master ekzekutiv, dhe programet e integruara, kreditet që i takon punimit të diplomës do të përcaktohen në të njëjtën mënyrë.
Pranimi në programet e ciklit të dytë
Pranimi në programet e ciklit të dytë të studimeve është i mundur për kandidatët që kanë përfunduar një program studimi të ciklit të parë dhe plotësojnë kriteret e pranimit të vendosura nga fakulteti ku ndodhet dega në të cilën kanë aplikuar.
Kriteret e pranimit të kandidatëve në programet e ciklit të dytë të studimeve përcaktohen nga njësia bazë ofruese e programit. Bëjnë përjashtim nga ky rregull programet e integruara të studimit. Kriter pranimi në një program studimi të ciklit të dytë “Master i shkencave” është njohja nga kandidati e një prej pesë gjuhëve të huaja të Bashkimit Europian: anglisht, frëngjisht, gjermanisht, italisht, spanjisht.
Nëse individi ka fituar një diplomë të një programi studimi të kryer në një nga këto gjuhë, diploma e fituar shërben si dëshmi për plotësimin e këtij kriteri. Niveli i njohjes së gjuhës së huaj përcaktohet me akt nënligjor të ministrisë përgjegjëse të arsimit të lartë. Po sipas kushteve të përcaktuara, institucionet e arsimit të lartë mund të njohin kredite të përfituara në programet e studimit të ciklit të dytë “Master profesional”, me qëllim transferimin e tyre në programet e studimit “Master i shkencave”.
Kreditet për programet “Master i shkencave”
Programet e studimit “Master i shkencave” pajisin të diplomuarit me njohuri të thelluara teorike, si edhe me aftësim për kërkim shkencor në një fushë të caktuar. Këto programe organizohen në: programe që realizohen me jo më pak se 120 kredite formimi në vijim të ciklit të parë dhe me kohëzgjatje normale dy vite akademike, si dhe programe të integruara të studimeve të ciklit të dytë, që realizohen me 300 dhe 360 kredite dhe me kohëzgjatje normale respektivisht pesë dhe gjashtë vite akademike.
Programet e integruara të studimeve të ciklit të dytë ofrohen në fushat e drejtësisë, mjekësisë, të stomatologjisë, të farmacisë, të veterinarisë e të arkitekturës. Këshilli i Ministrave përcakton fusha të tjera, në të cilat mund të ofrohen programet e integruara të studimeve të ciklit të dytë.
Kreditet në programet Master i arteve
Programet e studimit “Master i arteve” pajisin të diplomuarit me njohuri të thelluara, teorike dhe praktike, në fushën e arteve. Këto programe realizohen me jo më pak se 120 kredite formimi në vijim të ciklit të parë dhe me kohëzgjatje normale dy vite akademike.
Kreditet në programet “Master profesional”
Programet e studimeve “Master profesional” pajisin të diplomuarit me njohuri të thelluara, profesionale në një fushë të caktuar. Këto programe organizohen me 60 ose 120 kredite dhe kohëzgjatja normale e tyre është një vit ose dy vite akademike. Studimet e ciklit të dytë “Master profesional” përmbyllen me provim përfundimtar formimi ose punim diplome dhe në përfundim të tyre lëshohet diplomë “Master profesional” në fushën e arsimimit të kryer.
Kreditet programet Master ekzekutiv
Programet e studimeve “Master ekzekutiv” ofrojnë arsimim të një niveli të lartë shkencor dhe profesional. Ato kanë kohëzgjatje normale një ose dy vite akademike dhe organizohen përkatësisht me 60 ose 120 kredite. Ato përmbyllen me punim diplome dhe në përfundim të tyre lëshohet diploma “Master ekzekutiv” në fushën e arsimimit të kryer
p.k\dita
