Hepatiti është një nga sëmundjet më të përhapura dhe të rënda infektive edhe në vendin tonë. Në rastet kur sëmundja nuk trajtohet që në stadet më të hershme, çon në dëmtime të rënda të mëlçisë, deri në pasoja fatale për jetën. Ekzistojnë disa lloj hepatitesh, A, B, C, D dhe E, në vartësi të llojit të virusit që i shkakton. Në veçanti, hepatiti B dhe C çojnë në sëmundje kronike qindra miliona njerëz dhe janë shkaku më i zakonshëm i cirrozës dhe kancerit të mëlçisë që shpesh përfundojnë në vdekje
Për fat të keq shumica e njerëzve nuk e dinë që janë të infektuar, sepse nuk kanë shenja të dukshme që në stadet më të hershme. Kur ata fillojnë të kenë shenja, dëmtimet kanë përparuar. Nëse një person është i infektuar kjo mund të vërtetohet vetëm nëpërmjet bërjes së testit të gjakut. Por, kushdo që mendon se mund të ketë qenë i rriskuar për t’u infektuar, bën mirë të testohet.
Diagnoza e hershme ofron mundësi për trajtim efektiv mjekësor e rrjedhimisht për zbutjen e pasojave të sëmundjes dhe ndihmon të infektuarit të praktikojnë një stil jetese të shëndetshëm, duke marrë masa për të mbrojtur mëlçinë nga dëmtimi shtesë, si për shembull duke eliminuar alkoolin dhe droga të caktuara të cilat dëmtojnë mëlçinë. Gjithashtu, ndihmon të infektuarit të ndërmarrin hapa për të parandaluar transmetimin e sëmundjes tek të tjerët, për shembull duke zbatuar praktikat e sigurta seksuale, apo duke marrë masa për të mos t’ia transmetuar bebit të tyre.
Vaksinimi është një nga mënyrat për të parandaluar infektimin prej këtyre lloj viruseve. Aktualisht ekziston vaksina vetëm për hepatitin A dhe B, vaksina për hepatitin E është duke u testuar dhe ndërkohë është bërë progres lidhur me vaksinën kundër hepatitit C. Në Shqipëri, vaksinimi kundër hepatitit B realizohet si pjesë e kalendarit bazë të vaksinimit tek fëmijët. Kështu, fëmijët të cilët kanë lindur nga prilli i vitit 1994 e në vazhdim janë të vaksinuar kundër hepatitit B. Po ashtu vaksina kundër hepatitit B është sot e disponueshme në rrjetin farmaceutik shqiptar. Po ashtu, edhe ekzaminimi i gjakut për transfuzion parandalon transmetimin e virusit të hepatitit B e C, përdorimi i pajisjeve sterile gjatë injeksioneve mbron kundër hepatitit, praktikat e seksit të sigurt (përfshirë minimizimin e numrit të partnerëve dhe përdorimin e prezervativit) mbrojnë kundër transmetimit të hepatitit B dhe C, si dhe ushqimi i sigurt dhe sigurimi i ujit higjenikisht të pastër, sigurojnë mbrojtje të mirë kundër hepatitit A dhe E.
p.k\dita
