Për të siguruar pensione më të larta pleqërie, invaliditeti, apo edhe familjare, në ndihmë vjen skema e sigurimeve vullnetare. Në varësi të kontributeve të derdhura, nëpërmjet kësaj fushe sigurimi, me arritjen e kushteve të përfitimit (mosha e duhur dhe vjetërsia e punës), çdo qytetar do të mund të marrë pensione edhe më të larta se sa ato që mbulon skema e detyrueshme.
Sigurimin vullnetar për më shumë të ardhura mund të paguajnë të gjithë personat që janë ekonomikisht aktivë të vetëpunësuar, të punësuar dhe punëdhënësit, të cilët duhet të jenë të siguruar si të tillë në skemën e detyrueshme të sigurimeve shoqërore dhe shëndetësore.
Sipas kushteve të përcaktuara, sigurimi për vullnetar për më shumë të ardhura mund të bëhet vetëm për vitin korent.
Edhe për muajin mars, pagesa që duhet të bëhet në këtë degë të sigurimeve është në kufijtë e pagave minimale 34,000 lekë, deri në 4-fishin e saj (qytetari ka të drejtë të zgjedhë një pagë brenda këtij kufiri). Personat e vetëpunësuar sigurohen me pagë minimale mujore 34,000 lekë. Mbi këtë pagë çdo person ka të drejtë të sigurohet vullnetarisht deri në 4-fishin e saj.
Punëmarrësit që sigurohen në bazë të kontratës të nënshkruar me punëdhënësin, kanë të drejtë të sigurohen vullnetarisht për më shumë të ardhura mbi pagën që ata marrin, deri në 4-fishin e saj.
Ndërkohë që me rritjen e pagës minimale në shkallë vendi, që do të hyjë në fuqi nga data 1 prill, rritje do të pësojë edhe masa e kontributeve që do të mbulojnë skemën e sigurimeve vullnetare.
p.k\dita
