Fatjon Murati u lirua krejt në mënyrë të papritur dhe pa një njoftim publik për një çështje kaq të ndjeshme. Mësohet se nuk pati as komunikatë për ndryshimin e masës së sigurisë nga arrest me burg, në arrest shtëpie. Fatjon Murati u arrestua më 8 tetor 2022 nga Policia e Tiranës, pasi ishte shpallur në kërkim se zotëronte një arsenal armësh, në një apartament në zonën e Farkës, bashkë Kristjan Gjinin, të kapur nga policia më 13 korrik.
Por 2 muaj pas arrestimit, atij iu ndryshua masa e sigurisë nga “arrest në burg”, në “arrest shtëpie”, për shkak të provave lëkundëse, teksa Murati vetë e mohonte implikmimin, edhe pse një detaj i çështjes ishte gjurma e gishtit në mjetin e Gjinit. Vendimi për ndryshimin e masës së sigurisë është marrë nga gjyqtarja Migena Laska, në Gjykatën e Shkallës së Parë të Tiranës, pak ditë para atentatit, ndërkohë që Prokuroria ka qenë kundër. Çështja për “armëmbajtje pa leje” është dërguar për gjykim dhe pritet që në datën 15 mars, pra të mërkurë, prokuroria do të japë konkluzionet. Mirëpo, në një kohë kur Fatjon Murati ishte në masën e sigurisë ‘arrest shtëpie’, ai nuk e ka respektuar, por është arratisur nga banesa e tij pak orë para ngjarjes.
Mendohet se Murati deri para dy ditësh rezulton të ketë qenë në Tiranë, por ilegalisht dyshohet se ka kaluar kufirin për në Prishtinë dhe më tej ndoshta në Turqi. Hetuesit dyshojnë se ai është larguar në drejtim të Turqisë, detaje të cilat po verifikohen. Lokali i Fatjon Muratit ruhej me kamera sigurie, deri para pak kohësh kur policia nisi aksionin dhe këputi fijet e krimit. Tashmë është ILD dhe KLGJ që do verifikojnë nëse kjo zbutje masë është bërë konform ligjit dhe procedurave.
