Armand Gosa dhe Sali Rexha, dy 43-vjeçarët që vranë njëri-tjetrin në Kavajë pasditen e 29 marsit, u takuan rastësisht në lokalin ku ndodhi ngjarja e rëndë. Pak minuta mjaftuan për të tensionuar situatën për shkak të një konflikti për shkaqe krejt banale disa ditë më parë, për sharje nga origjina si “malok” dhe presioni që të ‘kthehej andej nga erdhi”.
Altin alias Sali Rexha ka qenë në lokalin afër shtëpisë së tij me qira, kur ka ardhur Armandi, i cili nuk ka lidhje me zonën pasi nuk jeton aty afër. Nuk dihet saktësisht nëse ardhja e Gosës pranë shtëpisë së Rexhës ka pasur synim konfliktin apo jo, por dëshmitarët e vendit të ngjarjes i thanë policisë se nisja e konfliktit ishte me fjalët “pse më sheh ashtu”.
Të dy viktimat rezultonin me precedentë të mëparshëm penalë, Gosa për vrasjen e Genti Gjuzit disa vite më parë, pasi e goditi me kazëm në sherrin që nisi për një vajzë, ndërsa Rexha ka të regjistruar një procedim për një sherr që ka ndodhur më herët. Të dy rezultojnë me emra të ndryshuar, që besohet se kanë pasur shkak problemet që mund të kenë pasur jashtë vendit.
