Ukraina nuk do të mund të jetë pjesë e NATO-s për sa kohë që lufta vazhdon, tha të mërkurën shefi i aleancës Jens Stoltenberg.
“Unë mendoj se të gjithë e kuptuan se, të bëhesh anëtar në mes të një lufte, nuk është në rendin e ditës,” tha ai në një ngjarje të organizuar nga Fondi Gjerman Marshall i SHBA-së në Bruksel.
“Çështja është se çfarë do të ndodhë kur të përfundojë lufta.”
Presidenti i Ukrainës Volodymyr Zelensky pritet të marrë pjesë personalisht në samitin e ardhshëmtë NATO-s në Vilnius në korrik dhe ka thënë më parë se do të ishte një moment i duhur për një deklaratë politike në lidhje me perspektivën e anëtarësimit të Ukrainës në NATO.
Stoltenberg tha se presidenti rus, Vladimir Putin, ka bërë “dy gabime të mëdha strategjike”, që sipas tij janë nënvlerësimi i “trimërisë” dhe “vendosmërisë” së ukrainasve dhe nënvlerësimi i aleatëve dhe partnerëve të NATO-s.
Zyrtarët në Rusi, shtet që ka nisur pushtimin e Ukrainës në shkurt të vitit 2022, kanë deklaruar se Moska e sheh veten të kërcënuar nga anëtarësimi i mundshëm i Ukrainës në NATO.
Ndërkaq, udhëheqësit në Kiev kanë thënë se dëshirojnë që në të ardhmen shteti i tyre të bëhet pjesë e NATO-s.
