Apeli i GJKKO nuk pranoi ankimin e Ramazan Rrajës, për masën e sigurisë “arrest me burg”, pasi është dorëzuar jashtë afatit. Rraja u arrestua tre javë më parë në Fushë-Krujë nga policia e Durrësit, pas disa muajve arrati. Ai akuzohet si i përfshirë në atentatin ndaj ish-prokurorit Arjan Ndoja, por edhe në disa krime të tjera, teksa u kap i armatosur me pistoletë në brez. Rraja është nipi i deputetit socialist të Krujës, Rrahman Rraja, ndërsa i ka mohuar akuzat e ngritura. Rraja u akuzua edhe për sulmin e armatosur në një lokal në Fushë-Krujë një vit më parë, teksa është dënuar edhe nga Belgjika në mungesë, ku akuzohet për çështje droge.
Vendimi i Apelit të GJKKO:
“Gjykata e Posaçme e Apelit për Korrupsionin dhe Krimin e Organizuar, me trup gjykues monokratik të përbërë nga gjyqtare Saida Dollani, sot më datë 17.05.2023, zhvilloi seancë gjyqësore për çështjen penale nr. 16 akti, datë 12.05.2023 regjistrimi, me objekt “kundër vendimit nr. 37 Akti, datë 20.04.2023 të Gjykatës të Posaçme të Shkallës së Parë për Korrupsionin dhe Krimin e Organizuar”, regjistruar mbi ankimin e personit nën hetim R.Rr., ndaj vendimeve nr. 80 akti, datë 20.11.2022 dhe nr. 37, datë 20.04.2023 të Gjykatës së Posaçme të Shkallës së Parë për Korrupsionin dhe Krimin e Organizuar që ka disponuar në lëndë të masave të sigurimit personal. Në përfundim, Gjykata e Posaçme e Apelit për Korrupsionin dhe Krimin e Organizuar vendosi: – Mospranimin e ankimit të paraqitur nga i hetuari R.Rr. dhe mbrojtësi i tij av. Elton Hyseni ndaj disponimeve nr. 89 akti, datë 20.11.2022 dhe nr. 37 akti, datë 20.04.2023 të Gjykatës së Posaçme të Shkallës së Parë për Korrupsionin dhe Krimin e Organizuar”.
