Policia britanike njoftoi se Peter Mandelson, ish-ambasadori i Mbretërisë së Bashkuar në Shtetet e Bashkuara, është liruar me kusht pas arrestimit në kuadër të një hetimi për shpërdorim detyre, që lidhet me marrëdhëniet e tij me financierin amerikan Jeffrey Epstein.
Zhvillimi vjen vetëm pak ditë pasi lidhjet me Epstein çuan në ndalimin nga policia të Prince Andrew.
Në një deklaratë të publikuar në orët e para të mëngjesit të së martës, një zëdhënës i Policisë tha: “Një burrë 72-vjeçar, i arrestuar nën dyshimin për shpërdorim të detyrës publike, është liruar me kusht në pritje të hetimeve të mëtejshme.”
Autoritetet nuk e bënë publik emrin e të dyshuarit, në përputhje me praktikën e zakonshme të policisë britanike. Megjithatë, më herët mediat kishin identifikuar të dyshuarin si diplomatin 72-vjeçar Mandelson. Ai u filmua të hënën pasdite teksa shoqërohej nga oficerë civilë nga banesa e tij në Londër drejt një automjeti policor.
Sipas burimeve hetimore, si Mandelson ashtu edhe Princi Andrew dyshohen se kanë përcjellë në mënyrë të papërshtatshme informacione qeveritare britanike tek Epstein. Arrestimet e bujshme në Mbretërinë e Bashkuar përbëjnë një nga pasojat më të forta deri tani nga publikimi, muajin e kaluar, i mbi 3 milionë faqeve dokumente të lidhura me Epstein nga Departamenti amerikan i Drejtësisë.
j.l./ dita
