Mënyra e papërshtatshme e ekspozimit të veshjeve të heroit popullor Çerçiz Topulli në Muzeun e Kalasë së Gjirokastrës ka shkaktuar reagime të ashpra në publik dhe media, duke sjellë dorëheqjen e drejtorit të Rajonit të Trashëgimisë Kulturore, Florian Hysi.
Shkak për valën e kritikave u bë manekini mbi të cilin ishin vendosur rrobat historike. Paraqitja e tij — me një parukë “moderne” dhe tipare që u konsideruan qesharake — u cilësua nga opinioni publik si fyerje ndaj figurës së Çerçiz Topullit dhe mungesë e thellë profesionalizmi muzeal.
Kritikët nënvizuan se përdorimi i elementeve të tilla zhvlerëson imazhin e herojve kombëtarë dhe cenon standardet e kurimit të muzeve tona.
Pas reagimeve të shumta në rrjetet sociale, Florian Hysi i ka paraqitur dorëheqjen kryetarit të Bashkisë së Gjirokastrës, Flamur Golemi, duke marrë përgjegjësinë për çështjen.
Në deklaratën e tij zyrtare, Hysi u shpreh:
“E marr këtë vendim me përgjegjësi dhe me bindjen se çdo detyrë publike duhet të shoqërohet me përgjegjësi personale për çdo veprim apo gabim që mund të ndodhë gjatë saj. Ajo që u konsiderua gabim u korrigjua menjëherë dhe unë marr të gjithë përgjegjësinë përsipër.”
d.xh. / dita
