Partia Demokratike ka depozituar në Kuvend një kërkesë për të zhvilluar mocion me debat me Kryeministrin Edi Rama. Por udhëtimet jashtë shtetit dhe përplasjet brenda PD-së, kanë bërë që deputetët e mbetur të grupit parlamentar të opozitës të falsifikojnë firmat e njëri-tjetrit për të arritur kuorumin e nevojshëm.
Nga një verifikim i thjeshtë i firmave të mëparshme të deputetëve Belind Këlliçi, Oerd Bylykbashi dhe Agron Shehaj konstaton lehtësisht se nuk përputhen me firmat e hedhura në kërkesën e paraqitur nga PD në Kuvend për interpelancë me Ramën.
Firma e hedhur pro dhe shkrimi i ndryshëm i emrit dhe mbiemrit të tre deputetëve, ngre dyshime të forta se kemi të bëjmë me një falsifikim të një dokumenti zyrtar që i është paraqitur Kuvendit.
Dyshimet shtohen edhe më shumë nëse do të bëjmë një kontroll të datës së dokumentit me udhëtimet e Belind Këlliçit dhe Oerd Bylykbashit. Prej më shumë se një jave kandidati i Berishës për Tiranën dhe nënkryetari i PD-së ndodhet në SHBA, ndërkohë që dokumenti ku janë mbledhur firmat ka një datë të mëvonshme.
Një fakt të tillë e pohon dhe Nënkryetarja e Kuvendit Ermonela Felaj. Përmes një postimi në rrjete sociale, Felaj ka publikuar fakte se si deputetët e opozitës kanë falsifikuar firmat e njëri-tjetrit. Ajo kujton se falsifikimi është vepër penale.
“A ka sjellje më degraduese për Parlamentin dhe për të ashtuquajturën opozitë , sesa të fallsifikojë nënshkrimet e deputetëve të vet në dokumenta të cilat i drejtohen Kuvendit???? Kaq hapur bëhet kjo , saqë edhe kur deputetët janë jashtë vendit, psh Belind Këlliçi e Oerd Bylykbashi , figurojnë sikur të kenë qenë këtu e të kenë firmosur.
Lehtësisht i dukshëm e i verifikueshëm manipulimi në letra , per të plotësuar kriterin numerik që disa kërkesa të vihen në lëvizje nga Kuvendi! E përsëritur në fakt! Dhe këtë herë është koha që fallsifikatori ose fallsifikatorja të zbulohet! Ekspertimi grafik e konfirmon këtë! Dhe jo vetëm kaq , por dhe të sanksionohet si cdo qytetar tjetër në RSh për krimin e fallsifikimit të dokumentave të parashikuar nga neni 186 i Kodit Penal! Stop fallsifaktorëve dhe gënjeshtarëve që betohen për shtet, për parlamentarizëm , për opozitë, por nuk bëjnë dot as më shumë dhe as më pak sesa cdo kundravajtës i rëndomtë i ligjit penal! #kuvendiishqipërisë”, shprehet Felaj.
