Në “Ditën Botërore të Infermierëve”, ministrja e Shëndetësisë dhe Mbrojtjes Sociale, Ogerta Manastirli, ka rikonfirmuar rritjen e pagës që do të bëhet për infermierët.
Ministrja Manastirliu tha se brenda prillit të 2024-ës paga për infermierët dhe punonjësit e tjerë të shkencave mjekësore teknike do të rritet me 150 dollarë.
Manastirliu me Presidenten e Urdhrit të Infermierëve Blerina Duka dhe Kryetaren e Odës së Infermierëve të Kosovës, Nexhmije Gori, kanë marrë pjesë në një ceremoni, ku kanë shpërndarë certifikatat e mirënjohjes dhe kanë vlerësuar figurën e infermierëve për kontributin e tyre në sistemin shëndetësor publik.
“Ne fuqizojmë figurën e profesionistit duke rritur pagat. Jemi krenarë që hartuam një plan, i cili projektoi rritjet e madhe për infermierët tanë, e cila do të realizohet në 2024, ku për të gjithë teknikët e shkencave mjekësore do të ketë një rritje page 150 dollarë dhe kjo rritje page do të bëhet realitet brenda prillit 2024. Gjithashtu për mjekët e përgjithshëm do ketë një rritje me 200 dollarë në muaj brenda prillit të vitit të ardhshëm”, u shpreh ministrja Manastirliu.
Sipas saj, nga viti 2018 janë punësuar me meritokraci dhe transparencë mbi 5 mijë infermierë nëpërmjet portalit “Infermierë për Shqipërinë”.
“Mundësuam që nëpërmjet portalit “Infermierë për Shqipërinë” të kemi një punësim meritokratik, transparent, të drejtë për gjithë teknikët e Shkencave Mjekësore dhe prej fillimit të portalit dhe deri më sot ne kemi punësuar 5 mijë teknikë të Shkencave Mjekësore të cilët sot janë në sistemin publik. Duke përzgjedhur më të mirët kemi më shumë cilësi në shërbimin e ofruar. Aktualisht kemi një listë të pritjes së profesionistëve më shumë se 1900 infermierë, logopedistë, fizioterapistë, apo teknik të shkencave të tjera mjekësore, të cilët janë pjesë e listës së pritjes së portalit. Vetëm nga janari deri tani që po flasim ne kemi punësuar mbi 550 profesionistë të shkencave teknike mjekësore”, bëri me dije Manastirliu.
p.k\dita
