SPAK arreston administratorin e inceneratorit të Elbasanit, Leli Kaja

SPAK ka zhvilluar këtë të hënë një aksion në Elbasan, ku është arrestuar Leli Kaja, administrator i shoqërisë “ECO-ELB” sh.a., i dyshuar për korrupsion pasiv të personave që ushtrojnë funksione publike.

Sipas SPAK, arrestimi u krye nga hetuesit e Byrosë Kombëtare të Hetimit në kuadër të një procedimi penal të regjistruar më 1 tetor 2026.

Nga hetimet e kryera deri në këtë fazë, dyshohet se Kaja i ka kërkuar dhe marrë 400 mijë lekë administratorit të një operatori ekonomik, në këmbim të moskryerjes së detyrave që i ngarkon ligji në funksionin e administratorit të “ECO-ELB”.

“Hetuesit e Byrosë Kombëtare të Hetimit (BKH), nën drejtimin e prokurorit të çështjes, sot, më 5.10.2026 arrestuan në flagrancë shtetasin Leli Kaja, administrator i shoqërisë “ECO-ELB” sh.a., i dyshuar për kryerjen e veprës penale “Korrupsioni pasiv i personave që ushtrojnë funksione publike”, e parashikuar nga neni 259, paragrafi 2, i Kodit Penal”.

Arrestimi u krye në kuadër të procedimit penal nr. 108 të vitit 2026, të regjistruar më datë 1.10.2026 nga Prokuroria e Posaçme kundër Korrupsionit dhe Krimit të Organizuar, mbi bazën e referimit të BKH-së. Gjatë hetimit u përdorën metoda speciale të hetimit dhe veprime të simuluara.

Nga veprimet hetimore të kryera deri në këtë fazë, dyshohet se shtetasi Leli Kaja ka kërkuar dhe marrë nga administratori i një operatori ekonomik shumën prej 400.000 (katërqind mijë) lekësh, në formën e përfitimit të paligjshëm, në këmbim të moskryerjes së detyrave që i ngarkon ligji si administrator i shoqërisë “ECO-ELB” sh.a.

Gjatë kontrollit personal, shtetasit Leli Kaja iu gjet dhe iu sekuestrua shuma e sipërpërmendur.

Hetimet vijojnë për zbardhjen e plotë të rrethanave të rastit dhe identifikimin e personave të tjerë të përfshirë”, njofton SPAK.

Çfarë është Eco-Elb

Shoqëria “Eco-Elb” sh.p.k. është një shoqëri aksionere publike e krijuar në fund të vitit 2021 me qëllim menaxhimin e mbetjeve urbane në të gjithë Qarkun e Elbasanit.

Kompania është 100% pronësi publike dhe ka si aksionerë 7 bashkitë e Qarkut të Elbasanit (Elbasan, Cërrik, Belsh, Gramsh, Librazhd, Peqin dhe Prrenjas).

Krijimi i saj erdhi për të marrë në dorëzim dhe për të menaxhuar parkun e përpunimit të mbetjeve (landfillin dhe impiantin/inceneratorin) në Elbasan, pasi biznesi privat që e kishte më parë u sekuestrua nga shteti gjatë hetimeve të procedimit penal për inceneratorët.

n.s. / dita