9 pasuri me vlerë mbi 700 mijë euro në pronësi të Raul Zenunaj, i dënuar për trafik të lëndëve narkotike janë konfiskuar nga Gjykata e Posaçme. Në favor të shtetit kalojnë, dy njësi biznesi në Vlorë dhe një bodrum që Zenunaj e kishte blerë në vitet 2012 dhe 2013 në vlerën e 20 milionë lekëve të rinj.
Gjithashtu edhe një apartament të blerë me vlerë mbi 10 milionë lekë të rinj. Të dënuarit për drogë shteti i merr edhe një automjet “BMV”, 5 mijë m2 arë dhe 100 m2 truall në Vlorë.
Togat e zeza konfiskuan edhe një shtesë 4 katëshe me sipërfaqe 640 m², për të cilën kishte investuar mbi 20 milionë lekë të rinj. Një pjesë e këtyre pasurive, rezultojnë se janë në emër të Zenunajt, por edhe të të afërmve të tij.
Zenunaj është ndaluar dhe dënuar në Itali gjatë operacioneve për goditjen e një grupi kriminal, për trafikimin e 8 ton e gjysmë kanabisi, kokaine dhe heroine. Aksionet e policisë në vitin 2019 u shtrinë edhe në disa qytete në Shqipëri.
Droga nga vendi ynë trafikohej drejt Italisë duke u shpërndarë më pas në vendet e tjera të Evropës, mes të cilave në Gjermani e Zvicër. Grupi kriminal e kishte bazën në Leçe. Raul Zenunaj u bë subjekt i operacionit “Forca e Ligjit” për deklarimin e pasurisë në vitin 2020, dhe një vit më vonë prokuroria vendosi sekuestron preventive.
o.j/dita
