TIRANË- SPAK ka lëshuar 11 urdhër arreste për disa persona, mes tyre emra të njohur. Gazetarët raportojnë se është arrestuar ish-drejtuesi i policisë Tiranë Erzen Breçani, ndërsa është shpallur në kërkim djali i tij.
Operacioni është zhvilluar nga SPAK pas komunikimeve të zbuluara në rrjetin “Sky”. Ish-funksionari i lartë i Policisë së kryeqytetit, Erzen Breçani akuzohet për përkrahje të autorit të krimit dhe pastrim parash.
Breçani është duke u transportuar në ambientet e Drejtorisë së Policisë në Tiranë, institucion që e ka drejtuar gjatë qeverisjes së Berishës.
Bashkë me të u arrestua shefi i krimeve në Komisariatin Nr.6 në Tiranë, Dedan Gjoni.
Ndaj Dedan Gjonit janë ngritur disa akuza për vepra të rënda penale, si ajo e sigurimit të kushteve për të kryer vrasje.
SPAK njoftoi se ata janë pjesë e një grupi të rrezikshëm kriminal, ku dyshohet se është edhe Ervin Mata.
Ervin Mata u bë i famshëm si i dashuri i këngëtares Elvana Gjata, i cili në vitin 2018 u përplas me Ervis Martinajn dhe grupin e tij në një lokal në zonën e ish-Bllokut.
Burime për Dita bëjnë me dije se arrestimet e SPAK janë lëshuar pikërisht pas zbërthimeve të mesazheve të Ervis Martinajt në aplikacionin e përdorur nga bota e krimit “SKY ECC”.
Kujtojmë se ishin familjarët e Ervis Martinajt që i dorëzuan prokurorëve të SPAK-ut, kodin unik që ai përdorte në aplikacionin e koduar, në tentativë për t’i ndihmuar në gjetjen e gjurmëve të tij, disa muaj pas zhdukjes së mistershme.
Veç personave të mësipërm në pranga ka rënë edhe një oficere e drejtorisë së kufirit. Bëhet fjalë për oficeren Jonida Babameto.
SPAK ka lëshuar gjithsej 11 urdhër-arreste. Personat e arrestuar dhe ata në kërkim akuzohen për pastrim parash, grup i strukturuar kriminal, trafik droge, sigurim kushtesh për të kryer vrasje, shpërdorim detyre dhe përkrahje të autorit të krimit.
Sipas njoftineve të fundit, mes të arrestuarve janë gjithsej 7 efektivë policie.
Nga informacionet paraprake dyshohet se ky operacion është faza e dytë e operacionit ‘Metamorfoza’, i cili më parë ka zbardhur një sërë ngjarjesh kriminale ku u vunë në pranga disa efektivë policisë, biznesmenë, si dhe drejtues të policisë së shtetit.
a.c./dita
