Strategjikët përleshen me grushta për plaçkën: Sherr për “pikën e voçkël”, Idajet Ismailaj me të birin dhunojnë djalin e ortakes

Një konflikt që ka degraduar në dhunë fizike raportohet të ketë ndodhur në mbledhjen e Bordit Drejtues të kompanisë “Finman shpk”.

Kjo kompani zotëron shoqëritë “Albstar shpk”, “Manastiri Resort shpk”, “Arena Center shpk” dhe shoqëri të tjera.

Sipas raportimeve në media, konflikti ka nisur pasi ortaku me shumicën e aksioneve, Idajet Ismailaj së bashku me djalin e tij Florid Ismailaj dhe truprojat e tyre kanë goditur me grushte dhe sende të forta si dhe kanë kërcënuar me jetë djalin e ortakes tjetër të shoqërisë Sokol Agalliu.

Raportohet se përplasja mes ortakëve ka lindur pasi Sokol Agalliu ka akuzuar Idajet Ismailajn dhe djalin e tij për vjedhjen e 500 milionë lekëve të tjera nga arka e kompanisë.

Po ashtu, Agalliu mësohet se pretendon se ka zbuluar se Idajet Ismailaj dhe djali i tij kanë përvetësuar edhe 750 m2 te Manastiri Resort.

Mësohet se aktualisht Sokol Agalliu ndodhet në urgjencën e një spitali privat në Tiranë, në gjendje të rëndë për shkak të goditjeve që ka marrë.

Manastiri Resort është një projekt i ndërtuar mbi zonën e mbrojtur të Butrintit. Qeveria zvogëloi sipërfaqen e zonës së mbrojtur për të nxjerrë tokën ku do ndërtohej resorti masiv.

Ky resort u bë i famshëm nga shprehja  e ish ministres së turizmit në Kuvend, e cila e quajti atë “një pikë e voçkël” për të minimizuar impaktin mjedisor në zonën e mbrojtur.

o.p. / dita