Rama akuzon për protestat Iranin, Saliun dhe mediat: Nuk jap dorëheqje, donin të më godisnin me një dron me eksploziv

Kryeministri Edi Rama ka mbajtur një fjalim të gjatë në Facebook në lidhje me protestat studentore që kanë përfshirë të gjithë vendin. Ai i është rikthyer akuzave për Iranin, Berishën dhe mediat, duke thënë se nuk e jep dorëheqjen.

“Ai matuf që del e bën thirrje për dhunë nga mëngjesi deri në darkë dhe nga ata rreth tij, që janë njësoj si ai, të tredhur dhe agresivë… Një dorë tjetër është Republika khomeiniste e Iranit. Në darkë mblidhen kllounët që himnizojnë dhunën në sallonet e medias tradicionale…” – tha ai.

Kryeministri foli edhe për një dron me eksploziv, që sipas tij është zbuluar me qëllim për ta goditur në zyrë apo në oborr dhe shtoi se nuk ka dëgjuar  argumente që ta bindin të largohet.

“Ju kam dëgjuar çdo ditë sepse keni ardhur poshtë dritares sime, ju kam dëgjuar o në burg o në litar, burg, burg, jep dorëheqjen. S’kam dëgjuar kërkesa. Keni ardhur aty 140 ditë dhe asnjëherë s’keni trokitur te dera dhe të të themi me njerëzillëk, sy më sy, pse duhet të ikësh.

Se me burg, burg, burg si në ato sheshet e mesjetës, s’jemi më.. Ti do që unë të iki, kjo është gjëja më normale në botë, por si do të iki unë? Të paktën hajde më bind pse duhet të iki unë ose të bind unë pse s’duhet të iki unë.”, tha Rama.

Lidhur me përdorimin e plumbave të gomës dhe nxjerrjen e forcave RENEA nga reparti për të rrethuar Kryeministrinë, Rama anashkaloi arsyet që parashikon ligji dhe mori shembull Francën e më pas futbollin.

“Shikoni policinë edhe në Francë po përdor plumbat e gomës. Kurse RENEA ka detyrë të dalë në momentin kur ka kërcënim, del kur luhet edhe një ndeshje futbolli Shqipëri-Serbi, ç’do të thotë kjo? Doli dhe do të dalë, nuk diskutohet. Do të shtrëngohet rrethi ndaj atyre me maska, e ka edhe ligji që nuk mund ta fshehësh identitetin”, tha Rama.

Ndaj akuzave që qarkullojnë në rrjetet sociale për praninë e personave të huaj civilë ose me uniformë që veprojnë mes policisë duke dhunuae brutalisht të rinjtë, Rama i cilësoi këto si marrëzi dhe dezinformim. Në fjalimin e tij të gjatë ai ka sulmuar edhe mediat duke i akuzuar se kontribuojnë në krijimin e një perceptimi të shtrembëruar për realitetin. Në përfundim, Rama përsëriti se nuk do të largohet nga detyra dhe se nuk do të lejojë që dhuna të pengojë sipas tij rrugën e Shqipërisë drejt Bashkimit Europian.

“Nuk është pushteti im në lojë, por tryeza e negociatave. Shqiptarët duhet të mendojnë qartë: duan këtë apo BE-në? Jeni ziliqarë, të paaftë, sepse nuk më mundni dot me fjalë dhe ju ka ardhur dita te guri. E nisët me shishe uji e vezë dhe arritët te guri. Kjo (integrimi) ndërpritet nëse unë iki dhe vjen neokomunisti apo matufepsi, duhet një kohë e gjatë”, deklaroi Rama.

j.l./ dita