Një tjetër shpërthim eksplozivi ka ndodhur orët e fundit në vend. Ende pa u bërë java e ngjarjes së ndodhur në Kurbin, Qarku i Lezhës u trondit sërish nga një shpërthim me eksploziv. Ngjarja ndodhi rreth orës 02:00 të mëngjesit, në fshatin Ungrej dhe objektiv i sulmit ishte banesa e Preng Pjetrit, ish-kryeplak dhe Kryetar i Partisë Demokratike në këtë fshat. Në momentin e ngjarjes, brenda shtëpisë kanë qenë kryefamiljari me bashkëshorten dhe nënën e tij, por fatmirësisht nga shpërthimi nuk pati persona të lënduar, por vetëm dëme të shumta materiale dhe panik.
Lënda plasëse u vendos nga persona ende të paidentifikuar, në verandën e shtëpisë 1 katëshe, ndërsa ekspertët nisën verifikimet për llojin dhe sasinë e përdorur të eksplozivit. Menjëherë pas sinjalizimit, policia mbërriti në vendin e ngjarjes, duke kryer të gjitha veprimet hetimore, me qëllim identifikimin dhe kapjen e autorëve. Paraprakisht besohet për një sasi me të paktën 1 kg tritol, pasi dëmet janë të konsiderueshme.
Në deklarimet e tij, objektivi i sulmit Preng Pjetri ka deklaruar se nuk ka konflikte, por pista kryesore është përqendruar tek konfliktet partiake që mund të kenë lindur në prag të fushatës elektorale, për zgjedhjet lokale të 14 majit.
Në lidhje me ngjarjen reaguan dhe Deputetja Lindita Metaliaj dhe kandidati për Bashkinë Lezhë Pashk Gjoni, të cilët ju bën thirrje organeve ligjzbatuese që të identifikojnë dhe vënë para drejtësisë autoret e vendosjes së lëndës shpërthyese, në banesën e kreut të PD në Ungrej.
