Ambasadorja e BE-së në Tiranë, Christiane Hohmann ka komentuar sulmin ndaj Top Channel, për të cilin tha se e dënon rreptësisht.
Në një intervistë televizive, Hohmann u shpreh se janë dy gjëra të rëndësishme që fshihen pas këtij sulmi: media e lirë dhe mundësia për të raportuar lirisht është vendimtare për çdo vend demokratik dhe për çdo vend që dëshiron të anëtarësohet në Bashkimin Evropian. Zyrtarja bën thirrje që kjo ngjarje e paprecedentë të hetojhet në thellësi që përgjegjësit të marrin pasojat.
“Para së gjithash, është dëshira ime t’i shpreh ngushëllimet e mia të thella familjes, por edhe kolegëve të rojës së sigurisë që u vra në këtë sulm të papranueshëm kundër një medie.
Dhe kjo është diçka që ne e shprehëm menjëherë të hënën e kaluar, pasi dëgjuam për të, duke përfshirë edhe Komisionerin Varhelyi, i cili i dënoi këtë sulm, sepse janë dy gjëra që janë shumë të rëndësishme për ne: media e lirë dhe mundësia për të raportuar lirisht është vendimtare për çdo vend demokratik dhe për çdo vend që dëshiron të anëtarësohet në Bashkimin Evropian.
Pika e dytë është se sundimi i ligjit është i rëndësishëm. Pra, ne kemi bërë thirrje dhe vazhdojmë t’u bëjmë thirrje aftësive të zbatuesve të ligjit që ta hetojnë këtë në thellësi, në mënyrë që përgjegjësit për sulmin të çohen në gjykatë dhe të ndjejnë pasojat”, tha ambasadorja e BE në Tiranë, Christiane Hohmann.
Nga analizimi i provave dhe puna hetimore e kryer nga policia dhe prokuroria e kryeqytetit, nuk ka akoma një emër konkret si autor i dyshuar.
m.b./dita
