Armando Broja vijon rikuperimin nga dëmtimi i rëndë që pësoi dhjetorin e vitit të kaluar, teksa koha e rikthimit në fushë afrohet gjithnjë e më shumë.
SuperSport mëson se mjekët kanë dhënë miratimin që sulmuesi kuqezi të zbresë në fushë për londinezët më 30 gusht, në ndeshjen e vlefshme për EFL Cup ndaj Wimbledonit, e cila do të zhvillohet në “Old Trafford”.
Duke pasur parasysh edhe faktin që përballë do të jetë një kundërshtar modest, pritet që Pochettino t’i japë disa minuta sulmuesit shqiptar, për të parë edhe se si do ta përballojë ngarkesën e një ndeshjeje të vërtetë.
Më pasi pritet që Broja të luajë një apo dy ndeshje me Chelsean U21 gjatë ndërprerjes së kampionatit, për t’u vënë plotësisht në dispozicion të trajnerit argjentinas, duke nisur nga mesi i shtatorit.
Vlen të theksohet se me shumë gjasë Armando Broja do t’i mungojë Kombëtares Shqiptare në dy ndeshjet eliminatore të Gjermani 2024, ndaj Republikës Çeke dhe Polonisë, më datat 7 dhe 10 shtator.
Trajneri Sylvinho nuk ka ndërmend të rrezikojë, duke grumbulluar sulmuesin që nuk luan prej më shumë se 8 muajsh, teksa rikthimi i Brojës me fanellën kuqezi pritet të ndodhë në muajin tetor.
