Takimi Shqipëri-SHBA/ Irani hedh akuza: Këto vende po abuzojnë me mekanizmat ndërkombëtarë në Këshillin e Sigurimit

Ministria e Jashtme e Republikës Islamike të Iranit në një deklaratë për mediat ka denoncuar mbajtjen e një takimi jozyrtar të propozuar nga Shtetet e Bashkuara të Amerikës dhe Shqipëria në Këshillin e Sigurimit të Kombeve të Bashkuara.

Sipas saj, ky ishte një shembull “i abuzimit të mekanizmave ndërkombëtarë për qëllimet e paligjshme amerikane dhe ndërhyrëse në punët e brendshme të vendeve të pavarura”.

“Në këtë takim në nivel ambasadorësh ishin vetëm përfaqësuesit e Shteteve të Bashkuara dhe Shqipërisë, por Amerika në mënyrë të pacivilizuar dhe jodemokratike e në ndryshim nga procedura e zakonshme nuk lejoi një fjalim për asnjë person apo vend tjetër që nuk është anëtar i Këshillit të Sigurimit”, u tha në deklaratë.

Ndërkohë SHBA-të dhe Shqipëria e thirrën mbledhjen jozyrtare të Këshillit të Sigurimit të OKB-së të mërkurën e 2 nëntorit.

Kjo, për protestat në Iran të shkaktuara nga vdekja e një gruaje të re (Mahsa Amini) në paraburgim policor.

Ambasadori i përhershëm i Shqipërisë në OKB, Ferit Hoxha, në fjalimin e tij manifestoi një mesazh të fuqishëm personal drejtuar protestuesve në Iran.

Kjo, duke sjellë në vëmendje rritjen e tij në një mjedis “diktatorial” si Shqipëria komuniste.

“Më lejoni ta mbyll me një shënim më personal për të rinjtë iranianë, për të gjithë ata që janë sot në rrugë. Unë kam lindur dhe jam rritur në Shqipëri, në një nga diktaturat më brutale komuniste që ka njohur ndonjëherë”, u shpreh fillimisht diplomati shqiptar.

Sipas tij, diktatura ishte aq e ashpër, komprometuese dhe paranojake, saqë njerëzit ishin të bindur se regjimi kontrollonte mendimet dhe ëndrrat e tyre.

“Pak do të guxonin të mendonin se një ditë do të kishim një jetë më të mirë, një shans të dytë. Shumë prej tyre ishin të gatshëm të paguanin me jetën e tyre”, vijoi Hoxha.

E megjithatë ndryshimi erdhi tre dekada më parë, shtoi ambasadori.

“Regjimi u shkatërrua dhe merreni me mend, kush ishte në vijën e parë: të rinjtë, studentët ishin aty dhe si rezultat ne të gjithë patëm një jetë të dytë, një jetë në liri dhe dinjitet”, theksoi në mesazhin e tij përfaqësuesi shqiptar.

Para se të linte hapësirën e fjalës për të ftuarit e tjerë në Këshillin e Sigurimit, Hoxha ktheu shikimin nga kamerat dhe iu adresua personalisht protestuesve iranianë.

“Mos u dekurajoni, mos e humbni shpresën, diktatura ushqehet gjithmonë nga frika (mos e ushqeni), obskurantizmi nuk ka fituar kurrë kundër lirisë dhe Irani nuk do të ishte përjashtim”, theksoi ai.

Misioni diplomatik shqiptar konfirmoi për “Albanian Post” se gjatë takimit u kërkuan mënyra për të promovuar hetime të besueshme dhe të pavarura për abuzimet e të drejtave të njeriut në Iran.

a.m/dita