TCH thotë se “rusi i arrestuar në Gramsh u zbërthye dhe pranoi spiunazhin”, faqja online ia kthen: “Këto janë pallavra”

Kanali TCH raporton se një nga të arrestuarit në Gramsh ka pranuar se ishte porositur nga agjentura ruse për të bërë foto në disa vende të Shqipërisë.

Sipas burimeve të këtij kanali, “shtetasi rus ka rrëfyer se është kontaktuar nga agjentë rusë për të bërë foto të objekteve të rëndësisë të veçantë si uzina ushtarake, porte dhe ujësjellësa në vendin tonë, por thotë se nuk ka më shumë informacione”.

Pjesë nga raportimi i TCH:

Sipas burimeve të Top Channel, shtetasi rus ka rrëfyer se është kontaktuar nga agjentë rusë për të bërë foto të objekteve të rëndësisë të veçantë si uzina ushtarake, porte dhe ujësjellës në vendin tonë, por thotë se nuk ka më shumë informacione. Mikhail Zorin ka deklaruar se me agjentët e vendit jo mik me Shqipërinë bëhej vetëm me Telegraf, por nuk i njeh me emra hetuesit rusë. Ai ka treguar se me dronin që u gjet në çantë, ka filmuar mbi liqenin e Bovillës dhe ka filmuar gjithashtu edhe në portin e Durrësit..

Por faqja online ResPublica thotë se ky raportim e rendit kanalin TCH në vijën e parë të budallallëkut.

“Një sherri absurd mes rusëve dhe ushtarëve qeveria po i jep tonin e një episodi spiunazhi. Në vijën e parë të budallallëkut publik, të paktën për mënyrën e raportimit, qëndron Top-Channel që po zbërthen ditë pas dite ca materiale ekskluzive që as i afrohen te maja e thembrës planeve të Tomit për të kapur Jerry-in në hapësirën e 3 minutave.  Tani pamje me dron të Bovillës dhe Durrësit gjen në youtube sa ta hanë qentë. Për çfarë duhen pamje me dron për llogari të shërbimeve sekrete?…” – shkruan Respublica.

Sipas saj, edhe vetë ministri i mbrojtjes Peleshi e bëri të qartë se puna e rusëve në Gramsh është një pallavër dhe se tani “autoritetet shqiptare po tentojnë të çmobilizojnë atë kuriozitet dhe spazmë publicistike që e ngritën vetë”.

Spiunë apo Blogerë Instagrami? Debati vazhdon ndërkohë që të mërkurën ose të enjten, tre të arrestuarit që u kapën të shtunën në Gramsh do të dalin para gjykatës.

Pavarësisht se pretendojnë që janë thjesht turistë që kanë hyrë edhe më herët në bazat ushtarake shqiptare nga ku kanë publikuar foto, ata po hetohen me akuzën e spiunazhit dhe po mbahen në drejtorinë e policisë së Elbasanit ku janë marrë në pyetje nga prokurorët.

a.d. / dita