Të gjithë personat e siguruar që plotësojnë kushtet për të përfituar pension, por që duan të vijojnë të punojnë, mund të aplikojnë për shtyrje të moshës së daljes në pension. E nëse marrin një vendim të tillë do të mund të përfitojnë edhe një shtesë mbi pensionin.
Sipas kushteve të përcaktuara në ligjin për sigurimet shoqërore, çdo i siguruar, që ka plotësuar kushtet për pension pleqërie, do mund të marrë shtesë në masën 0,5 për qind të pensionit për çdo muaj që shtyn datën e daljes në pension dhe vazhdon të paguajë kontribute nëpërmjet skemës së sigurimeve shoqërore.
“Përfituesi i pensionit të pleqërisë, që ndërpret pensionin, vazhdon të punojë dhe paguan kontribute, merr shtesë mbi pension në masën 0,5 për qind për çdo muaj ndërprerjeje. Kjo shtesë llogaritet mbi atë masë pensioni që rezulton pas rritjeve dhe indeksimit që ka pësuar pensioni gjatë kohës së ndërprerjes”, bëjnë me dije autoritetet e sigurimeve shoqërore.
Lidhur me kushtet e përfitimit të pensionit të pleqërisë, bëhet e ditur se personat e siguruar që kanë plotësuar jo më pak se 15 vite sigurim shoqëror, kanë të drejtë për pension pleqërie, kur të arrijnë moshën e përcaktuar në nenin 92, ligjit për sigurimet shoqërore. Ndërsa nënat që kanë lindur 6 a më shumë fëmijë, të cilët janë rritur më shumë se 8 vjeç, kanë të drejtë të dalin në pension kur mbushin moshën 55 vjeç dhe kanë 30 vjet sigurim. Pensioni mujor i pleqërisë përbëhet nga një shumë bazë dhe nga një shtesë. Shuma bazë llogaritet si raport i periudhës së sigurimit, që ka realizuar personi, me periudhën e sigurimit të kërkuar, shumëzuar me pensionin social. Shtesa do të jetë 1 për qind për vit sigurimi shumëzuar me bazën mesatare të vlerësuar që personat e siguruar kanë arritur nëpërmjet kontributeve, e llogaritur sipas nenit 59, të ligjit për sigurimet shoqërore. Shuma e përgjithshme e pensionit nuk mund të jetë më e vogël se pensioni social.
Prej datës një maj, sportelet e pritjes pranë Drejtorive Rajonale të Sigurimeve Shoqërore, Degëve të Sigurimeve Shoqërore dhe Agjencive Lokale të Sigurimeve Shoqërore kanë nisur të funksionojnë vetëm online, çka do të thotë se të gjitha procedurat e aplikimit për pensione apo përfitime të tjera të skemës së sigurimeve shoqërore mund të bëhen vetëm online. Qytetarët duhet që të gjitha aplikimet t’i bëjnë nëpërmjet platformës “e-albania”, dhe në rastet kur aplikimet kanë dokumente shoqëruese, ato do të dërgohen nëpërmjet Postës Shqiptare pranë strukturave rajonale të sigurimeve shoqërore ku dhe kanë bërë aplikimin, sipas kushteve të përcaktuara.
