“Nuk e lëshonte çantën, menduam se ishin hajdutë”, flet banori që u përlesh me rusët bashkë me ushtarët

Dy rusë dhe një ukrainas kanë tentuar ditën e djeshme të futen në uzinën ushtarake të Gramshit, ku dy ushtarë shqiptarë mbetën të lënduar.

Ata u prezantuan fillimisht si turistë, e më pas tentuan që të futeshin në uzinën e Gramshit dhe ushtarakët që kanë qenë në ruajtje të kësaj qendre strategjike kanë dalë për t’i ndaluar.

Në atë moment shtetasit rusë i kanë hedhur mjete djegëse dhe lëndë kimike duke i dëmtuar.

Dëshmitarët okularë thanë se personi që u ndalua kishte pasaportë ruse.

Sipas dëshmitarëve dhe banorëve pranë zonës ata kishin dy dite që vinin vërdallë rrethimit të uzinës dhe mbanin harta dhe aparate fotografike me vete.

Një prej personave që ishte prezent në momentin e sulmit të kryer ndaj ushtarëve shqiptarë në Uzinë, ka treguar për Euronews Albania çdo gjë që ka parë. Banori i cili kërkoi që të mos identifikohej ka treguar për gazetarin se rusi ishte ndjekur nga ushtarët deri në vendin ku ndodhej makina e tyre.

Ai tregoi se ishte gjendur në vendngjarje me të birin dhe i kishte kërkuar rusit të ndalonte, por në momentin kur ishte hedhur sprajin në drejtim të ushtarëve, ishte prekur edhe ai me të birin.

“Dëgjuam ca zhurma, ‘ndal, ndal’ kur erdhi makina. Unë ndërhyra me idenë se kishin vjedhur ndonjë gjë. Në atë moment hodhën sprajin që na kapi dhe ne, mua dhe djalin tim. Ai rusi nisi të bërtiste. Ushtarët u dëmtuan në sy dhe në gjoks. Bashkë me një person tjetër ndërhymë për t’i shkëputur çantën këtij rusit, se nuk e lëshonte”, tha banori.

j.l./ dita