Një ngjarje jo e zakonshme është regjistruar së fundmi dhe po qarkullon me shpejtësi në rrjetet sociale përmes një videoje ku shihet përplasja mes forcave të policisë dhe personelit të sigurisë së një lokali.
Në pamjet e publikuara, disa të rinj të cilët po ndiqeshin nga efektivët e policisë gjatë një momenti tensioni në protestë, shihen tek vrapojnë për t’i shpëtuar ndjekjes dhe futen brenda ambienteve të një lokali privat.
Në atë moment, stafi i sigurimit të biznesit ka ndërhyrë duke i lejuar të rinjtë të strehohen brenda. Menjëherë pas kësaj, rojet e sigurimit janë pozicionuar te dera kryesore, duke krijuar një kordon mbrojtës dhe duke mos lejuar efektivët e policisë të futen brenda ambienteve të biznesit pa një urdhër apo procedurë zyrtare.
Videoja ka nxitur diskutime të shumta në rrjetet sociale. Nga njëra anë, shumë qytetarë e kanë vlerësuar veprimin e sigurimit të lokalit si një gjest solidariteti dhe mbrojtjeje ndaj të rinjve, ndërsa nga ana tjetër ngrihen pyetje mbi kufijtë ligjorë të ndërhyrjes së policisë në ambiente private gjatë ndjekjes së personave në hapësira publike.
Sipas kuadrit ligjor në fuqi, hyrja e forcave të rendit në një ambient privat pa pëlqimin e pronarit apo pa një urdhër kontrolli lejohet vetëm në raste përjashtimore të përcaktuara qartë nga ligji, siç është kapja në flagrancë e kryerjes së një krimi të rëndë.
o.peci / dita
