Të huajt që kërkojnë viza për të jetuar në Shtetet e Bashkuara mund të refuzohen nëse kanë disa gjendje të caktuara shëndetësore, përfshirë diabetin ose obezitetin, sipas një udhëzimi të publikuar të enjten nga administrata Trump.
Udhëzimi, i përfshirë në një kabllogram që Departamenti i Shtetit u ka dërguar ambasadave dhe zyrave konsullore, dhe që është shqyrtuar nga KFF Health News, udhëzon zyrtarët e vizave që të shpallin të papërshtatshëm për hyrje në SHBA aplikantët për disa arsye të reja, si mosha apo mundësia që ata të varen nga përfitimet publike.
Dokumenti thekson se persona të tillë mund të konsiderohen si një “barrë publike”, pra, një ngarkesë e mundshme për burimet e SHBA-së, për shkak të problemeve shëndetësore ose moshës së tyre.
Megjithëse vlerësimi i gjendjes shëndetësore të aplikantëve ka qenë për vite pjesë e procesit të aplikimit për vizë, duke përfshirë kontrollin për sëmundje ngjitëse si tuberkulozi dhe verifikimin e historikut të vaksinimeve. Ekspertët thonë se udhëzimet e reja zgjerojnë ndjeshëm listën e gjendjeve shëndetësore që do të merren në konsideratë dhe u japin më shumë pushtet zyrtarëve të vizave për të marrë vendime mbi bazën e gjendjes shëndetësore të aplikantëve.
Ky udhëzim është pjesë e fushatës përçarëse dhe agresive të administratës Trump për të dëbuar emigrantët që jetojnë pa leje në SHBA dhe për të dekurajuar të tjerë që synojnë të emigrojnë drejt vendit. Fushata e Shtëpisë së Bardhë për kufizimin e emigracionit ka përfshirë arrestime masive të përditshme, ndalime për refugjatët nga disa vende të caktuara, si dhe plane për të kufizuar ndjeshëm numrin total të personave që lejohen të hyjnë në SHBA.
j.l./ dita
