Tensione të rënda dhe përplasje fizike janë regjistruar gjatë orëve të fundit në qytetin e Durrësit, ku një protestë e rinjsh, studentësh dhe gjimnazistësh ka agravuar në dhunë përpara godinës së Postës Shqiptare.
Të rinjtë e revoltuar janë drejtuar drejt pikës qendrore të postës në qytet, duke goditur godinën me sende të forta. Në vendngjarje kanë ndërhyrë menjëherë efektivët e forcave “Shqiponja” për të neutralizuar turmën dhe për të ndaluar me forcë protestuesit.
Gjatë ndërhyrjes, situata ka ikur nga kontrolli: një prej punonjësve të policisë ka kapur një të ri dhe e ka goditur me shkop gome, ndërsa të rinjtë e tjerë i janë kundërpërgjigjur me shpejtësi duke e goditur efektivin me sende të forta.
Zgjedhja e këtij objekti nga ana e protestuesve nuk duket të jetë e rastësishme. Bëhet fjalë për vendin ku ish-drejtoresha e degës, Elisabeta Mataj, u akuzua për përvetësimin dhe vjedhjen e qindra mijëra eurove (fondet e destinuara për pensionet e të moshuarve dhe ndihmat sociale), mjete që sipas hetimeve dhe denoncimeve janë shpërdoruar në lojëra fati e kumar.
Sikur të mos mjaftonte skandali me vjedhjen e parave të pensionistëve, revolta e të rinjve është ushqyer edhe më tej nga veprimet e institucioneve. Pavarësisht hetimeve të hapura dhe skandalit në postë, bashkëshorti i ish-drejtoreshës, Fetah Mataj, u emërua në poste drejtuese në Bashkinë e Durrësit (si përgjegjës për evadimin e mbetjeve), përpara se të arrestohej gjithashtu më vonë nën akuzat për kanosje e gjobëvënie ndaj vartësve.
Lirimi i ish-drejtoreshës nga qelia dhe kalimi i saj në “arrest shtëpie” pas vetëm dy muajsh është një nga ato ngjarje mes shumë të tjerash që ushqejnë ndjenjën e pamundësisë dhe pabarazisë para ligjit.
Revoltat e klëtyre ditëve reflektojnë edhe mllefin e grumbulluar ndaj pandëshkueshmërisë, korrupsionit zyrtar dhe emërimeve politike me precedentë kriminalë.
Policia ka rrethuar zonën dhe po punon për shoqërimin e personave të përfshirë në përplasje, ndërsa situata në qendër të qytetit mbetet e nderë.
Nga Durrësi për Dita
